Azərbaycan, Bakı, 19 avqust /Trend, müxbir E.İsmayılov/
Avtomobil istehsalçısı "Toyota" ABŞ və Braziliyada böyük istehsala başlamaq niyyətindədir. Bu barədə "Toyota" qrupuna daxil olan "Toyota Tsisho Corporation" şirkətinin baş layihə meneceri Teruyuki Mori deyib.
Böhran dövründə şirkət, ABŞ istisna olmaqla, öz istehsal müəssisələrindən heç birni bağlamayıb. Burada fəaliyyətin dayandırılmasına səbəb "General Motors"la alyansdan çıxmaq istəyi olub.
"Bu, məcburi edilib", - Mori qeyd edib.
Onun sözlərinə görə, hazırda şirkət orta və kiçik bazarlara böyük diqqət yetirir. Yeni istehsal müəssisəsinin açılmasına əsas kimi, bazarda tələb olunan avtomobillərin və ya gözlənilən sifarişlərin sayı götürülür.
Qeyd etmək lazımdır ki, dünya maliyyə-iqtisadi böhranı şirkətin istehsal həcminə xeyli təsir göstərib. Böhranadək şirkətin istehsal həcmi həmişə yüksələn xətlə gedib. Xüsusilə, "Toyota" böhranadək ildə 9-9,5 milyon avtomobil istehsal etdiyi təqdirdə, böhrandan sonra bu göstəricilər yeddi milyon ədədək azalıb.
Əvvəllər şirkətin müəssisələri üç növbədə işləyirdisə, indi iki növbədə işləyir. Bu, Yaponiyada fəal surətdə istifadə edilən müvəqqəti işçi heyətinin ləğv edilməsi sayəsində mümkün olub. "Bu sistem bu növ vəziyyətlərə operativ reaksiya göstərməyə imkan verir", - Mori vurğulayıb.
Onun fikrincə, şirkət böhranadək olan istehsal həcminə 3-5 ildən sonra qayıda bilər. Lakin bəzi ölkələrdə bu həcmə nail olunub və hətta ötülüb. Mori misal kimi, Çini göstərib.
