Azərbaycan, Bakı, 23 avqust /Trend, müxbir N.İsmayılova/
Dünya Bankı (DB) tərəfindən Azərbaycanda süni suvarma sistemlərinin yenidən qurulması və onların idarə edilməsinin təkmilləşdirilməsi üzrə ikinci layihənin reallaşdırılmasına ayrılan kredit xətti tam mənimsənilib. Bu barədə bankın Bakı nümayəndəliyindən məlumat verilib.
"DB layihənin başa çatması üzrə işlər aparır, ona ayrılan vəsaitlər artıq tam mənimsənilib", - nümayəndəlikdən bildiriblər.
Layihənin vaxtında, yəni cari il sentyabr ayının sonlarında başa çatacağı gözlənilir.
Bundan əvvəl DB cari ilin mart ayının 31-də başa çatmalı olan layihənin reallaşdırılması müddətini daha yarım il uzatmışdı. Layihənin investisiya portfelinin artıq tam istifadə olunmasına baxmayaraq, müddətin uzadılması yekun işlərinin aparılması ilə əlaqədar idi.
Bu layihənin maliyyələşdirilməsi üçün 2003-cü il iyunun 18-də Dünya Bankının İcraçı Direktorlar Şurası ümumi dəyəri 39,1 milyon dollar olan layihəyə 35 milyon dollar kredit ayrılmasını təsdiqləyiblər. Bu gün SDR məzənnəsinin 1,3-dən 1,55 dollaradək artdığı nəzərə alınarsa, bu məbləğ konvertasiya zamanı müvafiq olaraq 40 milyon dollaradək artır.
Layihədə əsas məqsəd Sudan İstifadə Edənlər Assosiasiyasının (SİA) və "Meliorasiya və Su Təsərrüfatı" SC-yə kömək göstərilməsi yolu ilə 56 000 hektar ərazini əhatə edən süni suvarma sistemlərinin effektivliyinin və maliyyə sabitliyinin artırılmasıdır.
Bu məqsədlərə çatmaq üçün layihə çərçivəsində SC-nin su ehtiyatlarından istifadə ilə bağlı təşkilati-texniki imkanlarının genişləndirilməsi; SİA personalının təhsili və tabeliyində olan süni suvarma və drenaj sistemlərinin istismarı və maddi-texniki bazasına rəhbərliyi öz üzərinə götürə biləcək təşkilata çevrilməsi üçün maliyyə ehtiyatları ayrılıb.
Sudan İstifadə Edənlər Assosiasiyasının inkişaf komponenti çərçivəsində bir neçə fəaliyyət növü nəzərdə tutulub. Ona təhsil və fəaliyyətin maddi təminatı planlarının işlənməsinə texniki yardımların göstərilməsi daxildir.
Layihə 11 rayonda 280-ə yaxın SİA-nı əhatə edir. Layihənin reallaşdırılması başa çatdıqdan sonra, Azərbaycanda SİA-nın davamlılığını təmin edəcək sabit və etibarlı institusional bazanın yaradılacağı gözlənilir.
Bu layihə ölkədə süni suvarma sistemlərinin yaxşılaşdırılması sahəsində DB-nin maliyyələşdirdiyi sayca ikinci layihədir. Süni suvarma və drenaj sistemlərinin bərpasını və inşasını nəzərdə tutan birinci layihə bank tərəfindən 2000-ci ildə təsdiq olunub. Onun məqsədi əsas suvarma kanallarının və qurutma kollektorlarının bərpası və tikintisinin başa çatdırılmasını nəzərdə tutur. Bu layihə keçmiş sovxoz və kolxozların süni suvarma və drenaj sistemlərinin bərpasını əhatə etmir və bu təsərrüfatların idarə edilməsinin genişləndirilməsini nəzərdə tutmur. Ümumi dəyəri 46,86 milyon dollar olan bu layihənin reallaşdırılması üçün DB 42 milyon dollar ayırıb. Layihə 2006-cı ildə başa çatıb.
Avqustun 23-nə rəsmi məzənnə 0,8038 AZN/USD təşkil edir.