Azərbaycan, Bakı, 26 avqust /Trend, müxbir N.İsmayılova/
Azərbaycanın "Qafqaz Lizinq" şirkəti cari ilin sonunadək lizinq portfelini 11 milyon manata çatdırmağı planlaşdırır. Bu barədə şirkətdən bildiriblər.
"Hazırda şirkətin lizinq portfelinin həcmi 8,5 milyon manat təşkil edir, ilin sonunadək portfelin 11 milyon manatadək artırılması planlaşdırılır", - şirkətdən deyiblər.
Şirkətin lizinq portfelinin əsasını altı milyon manatla avtolizinq təşkil edir.
"İndi şirkət lizinq xidmətlərinin çeşidinin genişləndirilməsi prosesindədir. Bunun nəticəsində mikrolizinqin payının artırılması planlaşdırılıb", - şirkətdən qeyd ediblər.
Hazırda mikolizinqin payına ümumi portfelin həcminin 300 min manatı düşür.
"Qafqaz Lizinq" ASC 2007-ci ilin oktyabrında yaradılıb. Şirkətin 100 faizlik təsisçisi NAB şirkətlər qrupudur. Şirkətin xidmətləri avtomobil sahəsi, eləcə də tikinti, ərzaq, toxuculuq, turizm, kənd təsərrüfatı, neft-kimya və b. sahələri əhatə edir. Şirkətin nizamnamə kapitalı 1,5 milyon manat təşkil edir.
