Gürcüstan, Tbilisi, 30 avqust /Trend, müxbir N.Kirsxaliya/
Avqustun 1-nə olan vəziyyətə görə, Gürcüstanın bank sektoru 19 bankla, eləcə də nizamnamə kapitalında xarici kapitalın olduğu 14 bankla və 2 xarici bankın filialı ilə təmsil olunub.
Gürcüstan Milli Bankının məlumatına görə, əvvəlki aylarla müqayisədə kommersiya banklarının ümumi aktivləri (hazırki qiymətlərlə) 577,6 milyon lari və ya 6,3 faiz artaraq 9792,3 milyon lari təşkil edib.
Bankların öz vəsaitləri 1636,6 milyon lari təşkil edib ki, bu da kommersiya banklarının bütün aktivlərinin 16,7 faizi qədərdir. Bankların nizamnamə kapitalında xarici kapitalın iştirakı 79,6 faiz təşkil edib.
Bank sektoru bundan əvvəlki ayda olduğu kimi, iyul ayını da mənfəətlə başa vurub. Ayın yekunlarına görə mənfəət 22,3 milyon lari (1 dollar = 1,83 lari), ilin əvvəlindən isə 59,6 milyon lari təşkil edib.
Bank sektorunda iri aktivlərə malik bankların payı əvvəlki aylarla müqayisədə 1 faiz artaraq 79,6 faiz təşkil edib.
