Аzərbaycan, Bakı, 2 sentyabr /Trend, müxbir S.Ağayeva/
Sentyabrın sonunda Bakıda Azərbaycanla Kuba arasında ticari-iqtisadi əməkdaşlığın genişləndirilməsi perspektivləri müzakirə olunacaq. Bu barədə cümə axşamı Trend-ə Kubanın Azərbaycandakı səfiri Marsello Kabalyero Tores deyib.
"Müzakirələr Kubanın xarici ticarət və investisiya nazirinin müavini Oskar Peres- Olivanın rəhbərliyi altında nümayəndə heyətinin Azərbaycana səfəri çərçivəsində aparılacaq", - Tores bildirib.
Nümayəndə heyətinin tərkibinə, həmçinin, Kuba Kənd Təsərrüfatı və Ticarət Palatası Nazirliyinin nümayəndələri daxil olacaqlar. Sentyabrın 28-30-da təşkil olunacaq səfər çərçivəsində, nümayəndə heyəti Azərbaycan Xarici İşlər, Mədəniyyət və Turizm nazirliklərində görüşlər keçirəcək. Həmçinin, "AZPROMO" nümayəndələrinin iştirakı ilə mini biznes-forumun keçirilməsi planlaşdırılır.