Azərbaycanda səhlənkar turist şirkətlərinin lisenziyalarının ləğvi bazarın inkişafına müsbət təsir göstərir - Turizm Agentlikləri Assosiasiyasının rəhbəri
Azərbaycan, Bakı, 4 sentyabr/Trend, müxbir A.Axundov/
Mədəniyyət və Turizm Nazirliyi tərəfindən bəzi turist şirkətlərinin lisenziyalarının və mehmanxanalarının ləğvi ölkədə turizm bazarının inkişafına müsbət təsir göstərir. Bu barədə Trend-ə şənbə günü Azərbaycan Turizm Agentlikləri Assosiasiyasının sədri Nahid Bağırov deyib.
"Nazirlik turist bazarını səhlənkar turist şirkətlərindən, eləcə də Azərbaycana xeyir gətirməyən, hətta ölkənin imicinə ziyan vuran otellərdən təmizləməyə çalışır", - Bağırov qeyd edib.
Onun sözlərinə görə, bu yaxınlarda assosiasiya tərəfindən monitorinq keçirilib və nəticədə mehmanxanaların çoxunda antisanitariya və digər pozuntular aşkar olunub.
"Açılaraq bir-iki ay işləyən və sonradan bağlanan birgünlük turist şirkətləri də var", - Bağırov bildirib.
Onun sözlərinə görə, Mədəniyyət və Turizm Nazirliyi lisenziyaların seçilməsi prosesini daha fəal davam etdirəcək.
"Nazirlik bu prosesi daha böyük qüvvə ilə davam etdirəcək. Monitorinqlər turist şirkətlərini və otelləri aşkar edərək bu təşkilatlara qarşı hansısa tədbirlərin görülməsi üçün onların siyahısı assosiasiya tərəfindən Mədəniyyət və Turizm Nazirliyinə təqdim ediləcək", - Bağırov vurğulayıb.
Azərbaycanda 100-dən çox turist şirkəti fəaliyyət göstərir.
Azərbaycan Turizm Şirkətləri Assosiasiyası 2009-cu ilin yanvarında Mədəniyyət və Turizm Nazirliyinin dəstəyi ilə yaradılıb. İdarə heyəti üzvlərinə "Improtex Travel", "Caspian Travel", "Pasha Travel", "Silkway Travel", "Euroturizm" şirkətlərinin rəhbərləri daxildir. Bu gün 51 turizm şirkəti assosiasiyanın üzvüdür.
Assosiasiyanın əsas fəaliyyət istiqamətləri:
- turizm şirkətlərinin maraqlarının qorunması;
- qanun layihələrinin işlənib-hazırlanması, milli turizm şirkətinin yaradılmasına yardım;
- bazar iştirakçıları üçün təlim və seminarların keçirilməsi üzrə plan hazırlanması;
- Azərbaycan turizminin illik beynəlxalq sərgilərdə potensial reklam və təşviqatı üçün şərtlərin yaradılması;
- daxili turizmin inkişafı və dünya bazarında turizm məhsullarının təqdim olunması.
Fəaliyyət istiqamətlərinə, həmçinin:
- konqres turizminin inkişafı və tətbiqi;
- idarəetmə və xidmət sahəsində peşəkar kadrların hazırlanmasına yardım;
- turizm sahəsində adekvat vergi qoyuluşunun yaradılması və normativ nizamlamalar;
- standartlaşdırma, sertifikatlaşdırma və lisenziyalaşdırmanın inkişafına yardım;
- beynəlxalq turizm şirkətləri ilə əməkdaşlıq;
- rəsmi nəşriyyat orqanının yaradılması;
- hüquqi məsləhətləşmələr sahəsində xidmətlər;
- normativ-hüquqi bazanın inkişafı çərçivəsində turizm şirkətlərinin hüquqlarının qorunması sahəsində əməkdaşlıq
daxildir.
