Azərbaycan, Bakı, 28 sentyabr /Trend, müxbir İ.Xəlilova/
Azərbaycan Sığortaçılar Assosiasiyası (ASA) Müşahidə Şurasının çərşənbə axşamı keçirilən iclasında oktyabrın 8-də təsisçilərin ümumi yığıncağının keçirilməsi ilə bağlı qərar qəbul edib. Bu barədə çərşənbə axşmaı iclasdan sonra Assosiasiyanın icraçı direktoru Qafar Məcidov deyib.
"Təsisçilərin yığıncağında Assosiasiyanın idarə heyətinin yeni sədrinin seçilməsi məsələsinə baxılacağı gözlənilir", - Məcidov qeyd edib.
Assosiasiyanın yeni rəhbərinin seçilməsi ASA Müşahidə Şurasının üzvü olan iki sığorta şirkəti - Beynəlxalq Sığorta Şirkəti və "Azərsığorta" arasında keçiriləcək. Lakin Məcidov bu vəzifəyə irəli sürülən namizədin adını açıqlamayıb.
Müşahidə Şurasının hər beş üzvündən biri nizamnaməyə əsasən, bir il müddətinə növbə ilə Assosiasiyaya sədrlik edirlər. Hazırda Assosiasiyaya iri sığorta şirkəti "Atəşgah"ın idarə heyətinin sədri Azər Əliyev başçılıq edir. Assosiasiyanın idarə heyətinin birinci sədri Kamal İbrahimov (Standard Insurance), ikincisi isə Cəmil Məlikov (MBASK-ın keçmiş sədri) olub.
Məcidovun sözlərinə görə, bu gün keçirilən iclasda sentyabrın 18-də keçirilmiş ilk Milli sığorta olimpiadasının yekunları, ASA-nın büdcəsinin üçüncü rüb üzrə icrası və sığorta şirkətləri üçün treninqlərin təşkili proqramları müzakirə olunub.
Azərbaycan Sığortaçılar Assosiasiyası 2006-cı ilin dekabrında təsis olunub.
Azərbaycanda 27 sığorta və bir təkrar sığorta şirkəti fəaliyyət göstərir.