Azərbaycan, Bakı, 29 sentyabr /Trend, müxbir E.İsmayılov/
Bütün beş Xəzəryanı dövlətin dəniz limanları öz aralarında sərnişin daşınmasını həyata keçirə bilərlər. Bu barədə çərşənbə günü Bakı Beynəlxalq Dəniz Limanındakı mənbə məlumat verib.
"Xəzər limanları arasında sərnişindaşımaların həyata keçirilməsi ilə bağlı niyyət var, lakin bunun üçün vaxt lazımdır", - mənbə deyib.
Onun sözlərinə görə, bu, rentabelli deyil, lakin hər şeydən əvvəl, Xəzəryanı dövlətlər arasında qarşılıqlı münasibətlərin möhkəmlənməsi üçün zəruridir. Həmçinin mənbə bildirib ki, Xəzəryanı dövlətlər arasında dəniz sərnişin reyslərinin reallaşdırılması, ilk növbədə, yeni gəmilərin, sərnişin axınının olmasını və zəruri investisiyaların cəlb olunmasını tələb edir.
Bir az əvvəl İran tərəfi Ənzəli-Bakı istiqamətində sərnişin reysinin bərpası haqqında təkliflə çıxış edib. Bu sərnişin xətti uzun müddət fəaliyyət göstərib, 1998-ci ildə isə müvəqqəti olaraq dayandırılıb. Onun bərpası haqqında məsələ İran və Azərbaycanın dövlər strukturları arasında razılaşdırılıb.
Lakin, mənbənin sözlərinə görə, İran tərəfi hələlik bu istiqamətdə sərnişindaşımalara başlamaqda fəallıq göstərmir.
Mənbənin bundan əvvəl verdiyi məlumata görə, İran tərəfi gələcəkdə Bakıdan İranın digər limanlarına - Əmirabad və Nouşəhrə daşınmalar həyata keçirməyi planlaşdırır.
