Azərbaycan, Bakı, 1 oktyabr /Trend, müxbir A.Axundov/
Azərbaycanın vergilər naziri Fazil Məmmədovun əmri ilə nazirlik yanında Vergi Apelyasiya Şurası yaradılıb. Nazirliyin rəsmi saytında dərc olunan şuranın yaradılması haqqında təsdiq olunmuş əsasnamənin mətnində deyildiyi kimi, Vergi Apelyasiya Şurası vergiödəyicilərin vergi orqanları tərəfindən qəbul edilən aktlarla bağlı şikayət və əriziələri üzrə məsələlərə baxan, eləcə də bu şikayət və ərizələr baxıldıqdan sonra qəbul edilən qərardan təkrar şikayətlərə baxan Azərbaycan Vergilər Nazirliyinin kollegial orqanıdır.
Apelyasiya Şurası, həmçinin, nazirliyin funksional idarəetmə aparatının yazılı tapşırıqlarının yerli vergi orqanları tərəfindən yerinə yetirilməməsi ilə bağlı müraciətlərə dair məsələlərlə də məşğul olur.
Şura korrupsiya ilə bağlı hüquq pozuntuları haqqında müraciətlərə baxmır.
Vergi Apelyasiya Şurası Nazirlər Kabineti, yerli vergi orqanları və qeyri-dövlət orqanları ilə birgə fəaliyyət göstərir.
Şuranın tərkibinə sədr və doqquz üzv daxildir.
Apelyasiya Şurasının tərkibi vergilər nazirinin əmri ilə təsdiqlənir.
Şurada açıq səsvermə keçirilir, qərar səs çoxluğu ilə qəbul edir. Səslər bərabər olarsa, sədr həlledici səs hüququna malikdir.
Apelyasiya Şurasının yenidən təşkili və ləğvi vergilər nazirinin müvafiq əmri ilə həyata keçirilir.