Azərbaycan, Bakı, 13 oktyabr /Trend, müxbir N.İsmayılova/
2010-cu ilin üçüncü rübünün yekunları üzrə Azərbaycan bankı "Turan Bank"ın aktivləri 127,5 milyon manat təşkil edib. Bu göstərici ötən ilin analoji dövrü ilə müqayisədə 25,8 faiz, ilin əvvəlinə nisbətən isə 16 faiz artıb. Bu barədə bankın çərşənbə günü yaydığı məlumatda deyilir.
Oktyabrın 1-də bankın kredit portfeli 95,5 milyon manat təşkil edib. Bu göstərici ötən ilin oktyabr ayının yekunları üzrə 35,6 faiz, ilin əvvəlində olduğundan 22,5 faiz çoxdur. İl ərzində bankın gəlirləri 28,4 faiz artaraq 11,3 milyon manat təşkil edib.
Bankın depozit portfelinin həcmi ötən illə müqayisədə 53,8 faiz, cari ilin üç rübü ərzində 25,7 faiz artaraq 45,4 milyon manat olub. İlin əvvəli ilə müqayisədə əhalinin uzunmüddətli depozitləri 228,3 faiz, il ərzində 60,9 faiz artaraq 28,9 milyon manat təşkil edib.
Məcmu kapital ilin əvvəli ilə müqayisədə 8,1 faiz, il ərzində 8,3 faiz artaraq oktyabrın 1-də 22 milyon manat, nizamnamə kapitalı isə 18,5 milyon manat səviyyəsində olub.
Bank, həmçinin, Rusiya, MDB ölkələri və xarici dövlətlərlə rubl, avro və dollarla pul köçürmələrinin həyata keçirilməsi məqsədilə "Zolotaya Korona" ani pul köçürmələri sisteminə qoşulmaq üçün danışıqlar aparır.
Bankın 25 səhmdarı var, onlardan beşi hüquqi (21,65 faiz) və 20-si fiziki şəxsdir (78,35 faiz).
Bu gün ölkədə bankın 11 filialı və 21 valyuta mübadiləsi məntəqəsi var.
Oktyabrın 13-də cari məzənnə 0,8018 AZN/USD təşkil edir.