Azərbaycan, Bakı, 20 oktyabr /Trend, müxbir N.İsmayılova/
Azərbaycan Auditorlar Palatası Polşa Auditorlar Palatası ilə birlikdə 2011-ci ilin yanvarında Bakıda "Müasir şəraitdə auditin aktual problemləri" mövzusunda ikigünlük simpozium keçirəcək. Bu barədə çərşənbə günü Azərbaycan Auditorlar Palatasının prezidenti Vahid Novruzov deyib.
"Artıq simpoziumun proqramı təsdiqlənib və keçirilmə müddəti dəqiqləşdirilib. Bu miqyasda tədbirin keçirilməsi ölkədə auditin təbliğinə, bu sahədə mövcud problemlərin aradan qaldırılmasına və beynəlxalq təcrübənin tətbiqinə xidmət edəcək", - Novruzov bildirib.
Onun sözlərinə görə, Azərbaycan Auditorlar Palatası ölkədə aparılan auditin keyfiyyətini tənzimləyir və effektivlik strategiyasına əsasən, onun qarşısında ölkədə beynəlxalq standartlara uyğun auditin inkişafının təmin edilməsi məqsədi durur. Bununla əlaqədar bu istiqamətdə sistemli tədbirlər keçirilir. Palata müxtəlif beynəlxalq institutların, o cümlədən, Beynəlxalq Mühasiblər Federasiyasının, Avropa Auditor və Mühasiblər Federasiyasına üzv olub.
"Biz, Azərbaycanın bu təşkilatlarda təmsil etməklə yanaşı, ölkəmizdə aparıcı beynəlxalq təcrübənin tətbiqi üzrə işlər də aparırıq. Bu günlərdə Avropa Auditor və Mühasiblər Federasiyasının icraçı-direktorunun Bakıya səfəri baş tutub və bəzi qurumların iştirakı ilə seminar təşkil edilib", - o qeyd edib.
Novruzovun sözlərinə görə, Auditorlar Palatası son üç ildə 15 ölkənin auditor və mühasibat strukturları ilə ikitərəfli əməkdaşlıq haqqında saziş imzalayıb və bu sahədə iş davam etdirilir.
