Azərbaycan, Bakı, 25 oktyabr /Trend, müxbir N.İsmayılova/
Beynəlxalq Valyuta Fondunun Azərbaycanın 2010-cu il üçün ÜDM-nin nominal həcmi üzrə proqnozları 52,2 milyard dollar təşkil edir. Bu barədə fondun bazar ertəsi BVF-nin rəsmi İnternet saytında yerləşdirilən "Yaxın Şərq və Mərkəzi Asiya: regional iqtisadiyyatın inkişaf perspektivləri" məruzəsində deyilir.
2011-ci il üçün ölkənin ÜDM-nin nominal həcmi üzrə proqnozları 57,9 milyard dollar təşkil edir. BVF-nin məlumatına görə, 2009-cu ildə bu göstərici 43,1 milyard manat olub.
BVF-nin məlumatına əsasən, 2010-cu ildə qeyri-neft ÜDM-nin artımı 5,6 faizə, 2011-ci ildə isə 5 faizə çatacaq. 2009-cu ildə ölkənin qeyri-neft ÜDM-nin artımı 3 faiz olub.
BVF-nin proqnozlarına görə, 2010-cu ildə Azərbaycanda neft ÜDM-nin artımı 3 faiz təşkil edəcək, 2011-ci ildə isə 1,3 faiz səviyyəsində azalma gözlənilir. 2009-cu ildə bu göstəricinin 14,8 faiz artımı müşahidə olunub.
BVF Azərbaycanda 2010 və 2011-ci illər üçün neft hasilatının həcmini sutkada bir milyon barel səviyyəsində proqnozlaşdırır. 2010-cu və 2011-ci illər üçün neft ixracı sutkada 0,9 milyon barel səviyyəsində gözlənilir.
Valyuta Fondu Azərbaycan üçün 2010-cu ildə real ÜDM-nin artım proqnozunu 4,3 faizədək artırıb. Əvvəllər bu, 2,7 faiz səviyyəsində proqnozlaşdırılmışdı. 2011-ci il üçün ölkənin ÜDM artımının proqnozu 0,6 faizdən 1,8 faizədək, 2015-ci il üçün 0,7 faizdən 0,9 faizədək artırılıb.
Asiya İnkişaf Bankı, öz növbəsində, 2010-cu ildə Azərbaycan üçün ÜDM-nin artım tempini 3,8 faiz səviyyəsində, 2011-ci il üçün 3,5 faiz səviyyəsində proqnozlaşdırır.
Azərbaycan Dövlət Statistika Komitəsinin məlumatına görə, 2009-cu ildə ölkədə ÜDM artımı 9,3 faiz olub, 2010-cu ildə ölkə hökuməti 6,8 faiz səviyyəsində artım gözləyir.
