Azərbaycan, Bakı, 27 oktyabr /Trend, müxbir H.Vəliyev/
2010-cu ilin yanvar-sentyabr aylarında Azərbaycanın Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi tərəfindən 7 043 hüquq pozuntusu halları aşkar olunub. Bu barədə Əmək və Əhalinin Sosial Müdafiəsi Nazirliyinin mətbuat xidmətinin rəhbəri Elnur Kələntərli çərşənbə günü bu ilin üç rübünün yekunlarına həsr olunmuş mətbuat konfransında bildirib.
Pozuntular müfəttişlik tərəfindən 2 250 müəssisə, eləcə də idarə və təşkilatlarda əmək qanunvericiliyinin tələblərinə əməl olunması üzrə keçirilən nəzarət tədbirləri zamanı aşkar edilib.
Pozuntulara, əsasən, ictimai iaşə obyektlərində (2 110 fakt), sənayedə (1 251), mənzil-kommunal xidmətində (594), elm, təhsil və mədəniyyət sahəsində (638) və tikintidə yol verilib.
Doqquz ay ərzində müqaviləsiz əmək fəaliyyətinə cəlb olunan 3 083 fiziki şəxslə əmək müqaviləsinin bağlanması təmin olunub. Ötən ilin analoji dövründə bu göstərici 6 160 nəfər təşkil edib. İşəgötürən inzibati hüquq pozuntularına görə müfəttişlik tərəfindən 667 300 manat həcmində cərimə olunub.
Hesabat dövründə müfəttişlik tərəfindən 2 024 vətəndaşın müraciətinə baxılıb; nəticədə, onlara 5 959 794 manat həcmində borcun ödənilməsi təmin olunub, qanunvericiliyin pozulması üzündən iş yerini itirmiş 52 nəfər isə əvvəlki iş yerlərinə bərpa olunub.
Ötən dövrdə istehsalatda 166 bədbəxt hadisə qeydə alınıb ki, nəticədə, 46 nəfər həlak olub və 135 adam müxtəlif dərəcəli bədən xəsarətləri alıb. Ötən ilin 9 ayı ərzində 192 bədbəxt hadisə qeydə alınıb, 49 nəfər həlak olub.
Oktyabrın 27-nə rəsmi məzənnə 0,8011 AZN/USD təşkil edir.
