Azərbaycan, Bakı, 19 noyabr /Trend, müxbir N.İsmayılova/
Azərbaycanın bank olmayan kredit təşkilatı "TBC Kredit" OPIC (Overseas Private Investment Corporation, USA) kredit xəttindən gələn ilin əvvəllərində 12 milyon dollar həcmində dördüncü tranşı alacağını gözləyir. Bu barədə cümə günü şirtkətdən bildiriblər.
"Bu ilin oktyabrında üçüncü tranşın alınmasından sonra şirkətin aldığı vəsaitin ümumi həcmi 4,1 milyon dollar təşkil edib", - "TBC Kredit"dən deyiblər.
2009-cu ilin noyabrında OPIC "TBC Kredit"ə ipoteka və biznes kreditləşməsinin inkişafı üzrə layihənin həyata keçirilməsi üçün 12 milyon dollar məbləğində uzunmüddətli kreditin verilməsini təsdiq edib. Layihənin ümumi dəyəri 16 milyon dollar təşkil edir. Bunun 25 faizi kredit təşkilatının öz vəsaitləri hesabına ödəniləcək.
"TBC Kredit" üçün üçüncü kredit xəttinin təsdiqlənməsi ilə OPIC-dən cəlb olunan ümumi vəsaitlərin həcmi 22 milyon dollara çatıb. "TBC Kredit" və OPIC 2004-cü ildən səmərəli əməkdaşlıq edirlər. "TBC Kredit" Azərbaycan bazarında OPIC-in işləməyə başladığı ilk təşkilatdır.
Bank olmayan kredit təşkilatı "TBC Kredit" Azərbaycanda 1999-cu ildən fəaliyyət göstərir. 2007-ci ilin dekabrından şirkətin payının 75 faizi aparıcı gürcü bankı "TBC Bank"a, 25 faizi isə "ShoreBank International Ltd"yə məxsusdur.
