Azərbaycan, Bakı, 27 noyabr /Trend, müxbir A.Axundov/
Azərbaycan Dövlət Gömrük Komitəsinin məlumatına görə, yanvar-oktyabr aylarında nəqliyyat vasitələri ilə 37,329 milyon ton tranzit, idxal və ixrac yükləri daşınıb ki, bu da 2009-cu ilin analoji dövründə daşınan yüklərin həcmindən 8,43 faiz çoxdur. Bu barədə şənbə günü komitədən bildirilib. Bu dövr ərzində ixrac 31,047 milyon ton, idxal isə 6,2821 milyon ton təşkil edib.
Bu ilin doqquz ayı ərzində dəniz nəqliyyatı vasitələri ilə 282,9 min ton yük, dəmiryolla 2,85 milyon ton, avtomobil vasitəsilə 454 min ton, hava nəqliyyatı ilə 195,1 min ton yük ixrac olunub, boru kəmərləri vasitəsilə nəql isə 27,253 milyon ton təşkil edib.
Dəniz nəqliyyatı ilə 706 min ton yük, dəmiryol vasitəsilə 4,24 milyon ton, avtomobil nəqliyyatı ilə 1,29 min ton və hava nəqliyyatı vasitəsilə isə 18 min ton yük idxal edilib.
Azərbaycan ərazisi ilə doqquz ay ərzində tranzitlə 7,75 milyon ton yük daşınıb ki, bu da 2009-cu ilin müvafiq dövründən 43,32 faiz, yaxud 2, 345 milyon ton çoxdur.
Azərbaycan ərazisindən tranzitlə İsveçrəyə 1,38 milyon ton yük, Bermud adalarına 2,278 milyon ton, İtaliyaya 1,457 milyon ton, Gürcüstana 476,1 min ton, Türkmənistana 150,5 min ton, Tacikisitana 339,2 min ton, Rusiyaya 177 min ton, Türkiyəyə 127,8 min ton, İrana 438,7 min ton, Əfqanıstana isə 344,4 min ton yük daşınıb.
