Azərbaycan, Bakı, 5 yanvar /Trend, müxbir Ü. İsmayılova/
Azərbaycanın sığorta şirkəti "Alfa Sığorta" 2011-ci ildə avtomatlaşdırılmış idarə sistemi tətbiq etməyi planlaşdırır. Bu barədə çərşənbə günü şirkətin Direktorlar Şurasının sədri Xəyal Məmmədxanlı deyib.
"Hazırda şirkətdə yeni sistemin tətbiqi üzrə hazırlıq işləri gedir", - Məmmədxanlı deyib.
Onun sözlərinə görə, mövcud sistem şirkətin daxilində bütün proseslərin aparılmasını - sığorta vəsiqəsinin hazırlanmasından, onun müştəriyə təqdim edilməsinə qədər, həmçinin maliyyə hesabatları və digər sənədlərin hazırlanmasını nəzərdə tutur.
"Alfa Sigorta" şirkəti idarəetmə sisteminin avtomatlaşdırılması çərçivəsində ilk dəfə ölkənin sığorta bazarında mobil rabitə vasitəsilə sığorta xidmətlərinin göstərilməsini tətbiq edəcək", - Məmmədxanlı deyib.
"Alfa Sığorta" ASC-nin təsisatçısı 2006-cı ilin dekabrında şirkətin 100 faizli səhmlərini alan "Texnikabank" ASC-dir. "Alfa Sığorta"nın altı mütləq, 24 könüllü olmaqla 30 növ sığorta xidməti göstərmək hüququ var. Şirkətin nizmanamə kapitalı 3,1 milyon manat təşkil edir.
Yanvarın 5-nə olan rəsmi məzənnə 0,7977 AZN/USD təşkil edir.
