Azərbaycan, Bakı, 8 yanvar /Trend, müxbir İ.Xəlilova/
Asiya İnkişaf Bankı (AİB) 2011-ci ilin ortalarına kimi Azərbaycandakı fəaliyyətinin qısamüddətli biznes planını hazırlamağı planlaşdırır. Bu barədə şənbə günü bankın Bakı nümayəndəliyindən məlumat verilib.
"Gələcəkdə biz öz biznes fəaliyyətimizi başa çatması 2012-ci ilə planlaşdırılan strategiya əsasında qurmaq fikrindəyik", - nümayəndəlikdən bildiriblər.
Strategiya üç ilə nəzərdə tutulacaq və həyata keçirilməsinə gələn ildən başlanıla bilər.
Hazırda Azərbaycan hökuməti strategiya əsasında digər beynəlxalq təşkilatlarla əməkdaşlıq əlaqələri qurur, AİB isə ilk dəfə olaraq Azərbaycan üçün strategiyasını hazırlamağı planlaşdırır.
Bank ölkədəki fəaliyyət prioritetlərini dəyişdirmək fikrində deyil. AİB ölkənin həm dövlət, həm də özəl sektorunda, energetika, nəqliyyat, şəhər təsərrüfatı sahələrində layihələr həyata keçirir. AİB əsasən ölkənin energetika və nəqliyyat sektorlarında layihələrin kreditləşdirilməsində maraqlıdır.
Bu il bank ilk dəfə olaraq AİB-in Azərbaycanda cari portfelinin icmalını aparmağı da planlaşdırır.
Azərbaycan 1999-cu ildən AİB-in üzvüdür. 2010-cu ilin əvvəlinə bankın ölkə üzrə kredit portfeli 14 layihə üzrə 660,4 milyon dollar təşkil edib. Əməkdaşlıq dövrü ərzində AİB Azərbaycan hökumətinə və yerli şirkətlərə 13,122 milyon dollar məbləğində qrantlar ayırıb.
AİB 1966-cı ildə təsis olunub və 67 üzvü var. Bankın mənzil-qərargahı Filippinin paytaxtı Manilada yerləşir. Azərbaycan 1999-cu il dekabrın 22-də Asiya bankının üzvlüyünə qəbul edilib, bank kapitalında ölkənin iştirak payı 0,5 faiz təşkil edir.
AİB-in əsas səhmdarları Yaponiya və ABŞ (ümumi səhmdar kapitalının 31,2 faizi), Hindistan və Çin (12,8 faiz), Avstraliya, Cənubi Koreya, Kanada (16 faiz) və digərləridir.
