Azərbaycan, Bakı, 15 yanvar/Trend, müxbir N.İsmayılova/
Vergilər Nazirliyində Amerika Birləşmiş Ştatlarının Beynəlxalq İnkişaf Agentliyinin (USAİD) "Azərbaycanda rəqabətlilik və ticarət" adlı layihəsinin rəhbərliyi ilə görüş keçirilib. Bu barədə şənbə günü nazirliyin məlumatında deyilir.
Vergilər nazirinin müavini Sahib Ələkbərov Azərbaycan və Beynəlxalq İnkişaf Agentliyi arasında qarşılıqlı əlaqələrin daha da gücləndirilməsinin vacib olduğunu vurğulayıb. Onun sözlərinə görə, Azərbaycan həm xarici ölkələr, həm də beynəlxalq təşkilatlarla sıx əməkdaşlıqda maraqlıdır.
ABŞ Beynəlxalq İnkişaf Agentliyinin İqtisadi İnkişaf Departamentinin direktoru Şila Yanqın sözlərinə görə, "Azərbaycanda rəqabətlilik və ticarət" adlı layihənin əsas məqsədi yerli biznes mühitinin yaxşılaşdırılması, vergi qanunvericiliyinin təkmilləşdirilməsi, ticarətin liberallaşdırılması və kənd təsərrüfatının inkişafının dəstəklənməsidir.
Görüşdə layihə çərçivəsində gələcək əməkdaşlığın istiqamətləri müəyyənləşdirilib, vergi qanunvericiliyinin təkmilləşdirilməsi, nağdsız ödənişlərin stimullaşdırılması, əmlak və torpaq vergiləri sahəsində elektron ticarət əməliyyatlarının vergiyə cəlb olunması və qarşılıqlı maraq doğuran digər məsələlər barədə ətraflı müzakirələr aparılıb.
