Azərbaycan, Bakı, 25 yanvar /Trend, müxbir N.İsmayılova/
2011-ci ildə Azərbaycanın Vergi Məcəlləsinə bir sıra əhəmiyyətli dəyişikliklərin və əlavələrin ediləcəyi gözlənilir. Trend-in məlumatına görə, bu barədə çərşənbə axşamı vergilər nazirinin birinci müavini Natiq Əmirov ötən ilin yekunlarına və 2011-ci ilin planlarına həsr edilən mətbuat konfransında deyib.
"Azərbaycanın keçid dövrünü arxada qoyduğunu və indi orta gəlirli ölkələr siyahısında olmasını nəzərə alaraq, bu, ölkənin iqtisadi inkişaf səviyyəsinə cavab verən və onu özündə əks etdirən vergi qanunvericiliyinin təkmilləşdirilməsini tələb edir", - Əmirov bildirib.
Onun sözlərinə görə, bununla əlaqədar Vergilər Nazirliyi ölkənin vergi qanunvericiliyinə bir sıra ciddi dəyişikliklər hazırlayır və onların hökumətlə ətraflı müzakirəsindən sonra bu dəyişikliklər cəmiyyətin diqqətinə çatdırılacaq.
"Bu dəyişikliklər və əlavələr vergi dərəcələrinin sərtləşdirilməsinə deyil, əksinə, ölkədə biznes mühitin yaxşılaşdırılmasına yönəldiləcək", - o, qeyd edib.
Azərbaycanın vergi qanunvericiliyinə son dəyişiklik 2010-cu ildə edilib.
1 yanvar 2010-cu il tarixindən birbaşa vergilərin bəzi növləri üzrə dərəcələr azalıb. Gəlir vergisi 22 faizdən 20 faizə, muzdlu işçilər üçün gəlir vergisinin maksimal məbləği 35 faizdən 30 faizə, sahibkarlıqla məşğul olan fiziki şəxslər üçün hüquqi şəxs olmadan 35 faizdən 20 faizədək endirilib.
Sadələşdirilmiş vergi sistemində də dəyişikliklər edilib. Əgər 2010-cu ilədək sadələşdirilmiş sistem üzrə vergini rüblük dövriyyəsi 22,5 min manatı ötməyən fiziki və hüquqi şəxslər ödəyirdilərsə, cari ildən sadələşdirilmiş vergiqoyma sisteminə illik dövriyyəsi 150 min manat təşkil edən hüquqi şəxslər və illik dövriyyəsi 90 min manat olan fiziki şəxslər daxil olacaqlar. Fiziki və ya hüquqi şəxslər tərəfindən bu hədd keçildikdə, onlar 10 gün ərzində Vergilər Nazirliyində ƏDV ödəyicisi qismində qeydiyyatdan keçməlidirlər.
2010-cu ildən etibarən ödənişli əsasda fəaliyyət göstərən məktəbəqədər müəssisələrin ƏDV-nin ödənilməsindən azad edilməsi də tətbiq edilib. Vergi qanunvericiliyinin təkmilləşdirilməsi çərçivəsində yenilik hesab-fakturanın elektron formada təqdim edilməsidir. Nəticədə, Azərbaycan Şərqi Avropa və MDB də elektron hesab-faktura tətbiq edən ilk ölkə olub. ƏDV dərəcəsinin bu il 1 faiz azaldılması ilə bağlı təkliflərə baxmayaraq, cari ildə dərəcənin dəyişməz olaraq, 18 faiz səviyyəsində saxlanılması planlaşdırılır.
2010-cu ildə vergi qanunvericiliyinə ümumilikdə dörd istiqaməti - vergiödəyicilərinin hüquqlarının artırılması və maraqlarının qorunması (19), vergi administrativliyinin (16) və vergi nəzarətinin (7) təkmilləşdirilməsi, eləcə də redaktə xarakterli (4) dəyişikilikləri əhatə edən 46 dəyişiklik edilib.
