Azərbaycan, Bakı, 26 yanvar /Trend, müxbir N.İsmayılova/
Azərbaycan və Latviya vergi qanunvericiliyinin icrası və informasiya mübadiləsi məsələləri üzrə qarşılıqlı inzibati yardım barədə saziş imzalayıblar. Bu barədə Azərbaycan Vergilər Nazirliyinin "Vergilər" qəzetində dərc olunmuş məlumatda deyilir.
Sazişi Azərbaycan tərəfdən vergilər naziri Fazil Məmmədov, Latviya tərəfdən Dövlət Gəlirlər Xidmətinin baş direktoru Neliya Yezdakova imzalayıblar.
Mövcud saziş Azərbaycan və Latviyanın vergi orqanlarına avtomatik, könüllü və vergi məlumat mübadiləsi tələblərinə əsaslanan vasitələrdən istifadə etmək və həmçinin eynivaxtlı vergi yoxlamaları və nəticələr üzrə informasiya mübadiləsi aparmaq, vergi qanunvericilyinin pozulması və vergidən yayınma hallarına qarşı təsirli birgə mübarizə aparmağa imkan verəcək.
Saziş, həmçinin milli vergi sistemləri üzrə məlumat mübadiləsi, vergi qanunvericiliyində dəyişikliklər, vergi qanunvericiliyinin pozulmasının aradan qaldırması üzrə metodiki tövsiyələr, qarşılıqlı təcrübə mübadiləsi, vergi qanunvericiliyi pozuntularının aradan qaldırılması məsələləri üzrə birgə seminarlar və digər tədbirlərin keçirilməsini nəzərdə tutur.
Beynəlxalq vergi sisteminə inteqrasiyanı genişləndirmək və vergidən yayınma hallarının aradan qaldırılması üçün digər ölkələrin vergi administrasiyaları ilə qarşılıqlı inzibati yardım haqqında oxşar sazişlərin imzalanması Azərbaycan Vergilər Nazirliyinin fəaliyyətinin prioritet sahələrindən biridir və bu istiqamətdə görülən işlər davam etdirilir.
Saziş Azərbaycan Prezidenti İlham Əliyevin yanvarın 17-18-də Latviyaya rəsmi səfəri çərçivəsində imzalanıb.
