Azərbaycan, Bakı, 18 fevral /Trend, müxbir A.Axundov/
Türkiyənin ən iri supermarketlər şəbəkəsi "Migros Ticaret" Bakıdakı "Ramstore" supermarketlər şəbəkəsinin Dubayın "İntersun Hilding FZCO" şirkətinə satılması haqqında saziş imzalayıb. Bu barədə cümə axşamı Trend-ə şirkətdən məlumat verilib.
"Migros Ticaret" Azərbaycanda üç supermarketin daxil olduğu "Ramstore" MMC-nin yüz faizlik sahibidir.
Şirkətdən Trend-ə verilən məlumata görə, sövdələşmənin dəyəri bütün satış prosedurlarının başa çatmasından sonra məlum olacaq.
Türkiyə KİV-in məlumatına görə, Azərbaycandakı ticarət şəbəkəsi 14,25 milyon dollara satılır.
"Ramstore" MMC 1995-ci ilin oktyabrında yaradılıb, ilk supermarket 1996-cı ilin aprelindən fəaliyyət göstərir.