Azərbaycan, Bakı, 28 fevral /Trend, müxbir Ü.İsmayılova/
Azərbaycanda quşçuluq fəaliyyətinin inkişafı üzrə dövlət proqramı hazırlanır. Bu barədə bazar ertəsi Trend-ə Azərbaycan Quşçular Cəmiyyətinin sədri Aydın Əliyev deyib.
"Proqramın hazırlanması demək olar ki, başa çatıb və yaxın vaxtlarda Nazirlər Kabinetinə təqdim ediləcək", - Vəliyev bildirib.
Onun sözlərinə görə, Nazirlər Kabinetinin tapşırığına əsasən, dövlət proqramı Kənd Təsərrüfatı Nazirliyinin, nazirlik yanında Dövlət Veterinar Xidmətinin nümayəndələri ilə birgə hazırlanır.
Quşçuluq fəaliyyətinin inkişafının dəstəklənməsi üçün Nazirlər Kabinetinin 25 yanvar 2011-ci il tarixli qərarı ilə texniki avadanlıq, inkubator və damazlıq quşların idxalı ƏDV və gömrük rüsumlarından azad edilib.
"Lakin Nazirlər Kabinetinə istehsalçılar üçün ən vacib problemlərdən biri olan quşçuluq fabrikləri üçün yemlərin ƏDV-dən azad edilməsi ilə bağlı çoxsaylı müraciətlərə baxmayaraq, indiyədək bununla bağlı qərar qəbul edilməyib", - Vəliyev vurğulayıb.
"Bu güzəştlərin tətbiqi ilə bağlı təkliflərin irəli sürülməsi hazırlanan proqramın bəndlərindən biridir", - Vəliyev bildirib.
Onun fikrincə, quşçuluq sahəsinin zəif inkişafının səbəblərindən biri dondurulmuş quş ətinin idxalıdır. Bu da daxili istehsalın inkişafına mane olur. Bu məsələ də hazırlanan proqramda öz əksini tapıb.
Azərbaycan Quşçular Cəmiyyəti hələ 2009-cu ildə hökumətə quşçuluq fəaliyyəti üçün yemin və digər məhsulların ƏDV-dən azad edilməsi ilə bağlı müraciət etmişdi. Belə ki, quşlar üçün yemin 90 faizi idxal edilir, bu isə fabriklər üçün böyük xərclərə səbəb olur. Quşçuluq fabriklərinin çoxu quşların saxlanılması üçün böyük xərclərin çəkilməsi səbəbindən bir sıra problemlərlə rastlaşırlar.
2008-ci ilin oktyabrında Bakıda iki böyük quşçuluq fabriki "Mərdəkan Broyler" və "Hövsan Broyler" bağlandı. Bu, fabrikin saxlanılması üçün vəsait çatışmazlığı səbəbindən baş verdi. Bu, sahibkarlar üçün böyük problemlər yarada, toyuq əti və yumurtasının qiymətinin xeyli artmasına gətirib çıxara bilərdi.
Azərbaycan İqtisadi İnkişaf Nazirliyinin Sahibkarlığa Kömək Milli Fondu 2011-ci ildə fəaliyyətinin prioritet istiqamətlərindən biri kimi quşçuluq sahəsi layihələrinin maliyyələşdirilməsini müəyyənləşdirib", - bundan əvvəl SKMF rəhbəri Şirzad Abdullayev bildirib.
"2011-ci il üçün belə prioritet istiqamət fond tərəfindən ölkə əhalisinin daxili istehsal hesabına yaxın bir neçə il ərzində təmin edilməsi ilə bağlı dövlət başçısının tapşırığının həyata keçirilməsi məqsədilə seçilib", - Abdullayev deyib.
Onun sözlərinə görə, bununla əlaqədar bu il ərzində fondun prioriteti aqrar sektorun sürətli inkişafını təmin edən layihələrin maliyyələşdirilməsi olacaq. Bu məqsədlə SKMF belə layihələrin maliyyələşdirilməsi üzrə öz fəaliyyətini fəallaşdırmaq niyyətindədir.
"Quşçuluq sahəsinin maliyyələşdirilməsi ilə yanaşı, fond süd istehsalı üzrə müəssisələrin, heyvandarlıq və anbar komplekslərinin tikintisi kimi və yüksək texnologiyalardan istifadə etməklə, digər sahələrdə güzəştli vəsaitlər verəcək", - Abdullayev vurğulayıb.
Respublika Quşçular Cəmiyyətinin tərkibinə 29 müəssisə daxildir. Onun 28-i quşçuluqdur və yalnız bir şirkət veterinar dərman preparatlarının distribüteridir. Azərbaycanda quşçuluq sahəsi ilə məşğul olan işçilərin sayı orta hesabla 15-20 min nəfərdir.
