İranın Yollar və Nəqliyyat Nazirliyinin icrasına başlanmış və yarımçıq qalmış layihələrinin tamamlanması üçün 70 milyard dollar sərmayə lazımdır. Bunu nazirliyin müvəqqəti rəhbəri Əli Nikzad deyib. Bu barədə Trend İranın İRNA dövlət informasiya agentliyinə istinadən məlumat verir.
Nikzad əlavə edib ki, ölkə büdcəsindən Yollar və Nəqliyyat Nazirliyinə ümumilikdə 6,5 milyard dollar vəsait ayrılıb.
"Bu səbəbdən prioritet layihələr seçiləcək və onların tamamlanması üçün maliyyə ayrılacaq. Bundan başqa, özəl sektorun vasitəsilə də layihələrin maliyyələşdirilməsini nəzərdə tutmuşuq", - Nikzad deyib.
Fevralın 1-də İran Parlamenti ölkənin yollar və nəqliyyat naziri Həmid Behbəhanini vəzifəsindən uzaqlaşdırıb. Bunun səbəblərindən biri nazirin yolların inşası və nəqliyyat sahəsində inkişafla bağlı verdiyi vədlərin həyata keçirilməməsi olub.
