Azərbaycan, Bakı, 9 mart /Trend, müxbir Ü.İsmayılova/
2010-cu ilin yekunlarına görə, Azərbaycanda fəaliyyət göstərən sığorta şirkətlərinin məcmu kapitalı 153,6 milyon manat təşkil edib. Bu, 2009-cu ilin yekunlarından 48,5 milyon manat və ya 46 faiz çoxdur. Bu barədə ölkə hökumətinin ötən ilin yekunları üzrə hesabatında deyilir.
"Azərbaycanın sığorta şirkətləri tərəfindən verilən operativ informasiya əsasında 2010-cu ilin yekunlarına görə sığorta haqları 155,6 milyon manat təşkil edib. Bununla yanaşı, şirkətlərin adambaşına düşən sığorta haqları 17,3 manat təşkil edib", - hesabatda deyilir.
Sığorta haqlarının ümumi həcmindən 80 faizi sığortanın könüllü və 20 faizi icbari növlərinin payına düşüb. Bu dövr üçün həyat sığortası üzrə haqlar 1,5 milyon manat, həyat sığortasından başqa sığorta haqları üzrə 154,1 milyon manat təşkil edib.
Ötən il Azərbaycanın sığorta şirkətlərinin ödənişləri 53,8 milyon manat, habelə sığortanın könüllü növləri üzrə - 45,3 milyon manat, icbari üzrə - 8,5 milyon manat təşkil edib.
Həyat sığortası üzrə ödənişlər 0,33 milyon manat, həyat sığortasından başqa - 53,5 milyon manat təşkil edib.
Ölkədə 2010-cu ilin sonuna 27 sığorta şirkəti (o cümlədən xarici kapitalın iştirakı ilə beş şirkət), bir təkrar sığorta və altı broker şirkəti (həmçinin beş xarici kapitalın iştirakı ilə) fəaliyyət göstərib.
2010-cu il ərzində Azərbaycan Maliyyə Nazirliyi broker fəaliyyətinin göstərilməsi üçün bir fiziki şəxsə, eləcə də agent xidmətlərinin göstərilməsi üçün bir hüquqi və 61 fiziki şəxsə lisenziya verib. Həmçinin, daha əvvəl verilmiş lisenziyaların müddətinin başa çatması ilə əlaqədar Maliyyə Nazirliyi "Xalq Sigorta" ASC, "A-Qroup" ASC və "Azal Sığorta" QSC-yə sığorta xidmətlərinin göstərilməsinə müddətsiz lisenziyalar verib.
2010-cu ildə sığorta nəzarəti orqanı beş sığorta və iki broker şirkətinin fəaliyyətini yoxlayıb. Aşkar edilmiş çatışmazlıqlarla əlaqədar icrası məcburi göstərişlər verib. Həmçinin, bu dövr ərzində sığorta şirkətlərini ödəməkdən əsassız olaraq imtina edilən təxminən 200 min manat ödəniş təmin edilib.
