Azərbaycan, Bakı, 29 mart /Trend, müxbir İ.Xəlilova/
Layihələrin həyata keçirilməsinin gedişi ilə tanış olmaq üçün Almaniya İnkişaf Bankı KfW-nin birinci vitse-prezidenti xanım Yeva Vitt Azərbaycana səfərə gəlib. Bu barədə çərşənbə axşamı Trend-ə bankın Bakı ofisindən bildirilib.
Azərbaycanın KfW ilə əməkdaşlığı 1994-cü ildən başlayıb. Bankın ölkədə strateji fəaliyyət istiqamətləri enerji, su və digər infrastrukturun bərpası, maliyyə, bank, özəl sektor, səhiyyə sisteminin, ətraf mühitin və s. inkişafına dəstək verməkdir. Azərbaycan üzrə portfel hazırda 150 milyon avronu ötür.
Əməkdaşlığa başladıqdan sonra KfW üstünlüyü əsasən Azərbaycan layihələrinin güzəştli maliyyələşdirilməsinə (10 ili güzəştli olmaqla 40 il müddətinə və illik 0,75 faizlə) verib, lakin son illər bank qarışıq şərtlərlə kreditləşməyə keçib.
KfW-nin Bakı ofisindən dediklərinə görə, bankın vitse-prezidentinin səfəri cümə axşamınadək davam edəcək. Hazırda Vitt Gəncə və Şəki şəhərlərində su təchizatı və kanalizasiya sisteminin bərpası layihəsi çərçivəsində tikinti işlərinin gedişi ilə tanış olmaq üçün Şəkidədir. Hazırda tikinti işlərinə Şəkidə başlanıb və yaxın vaxtlarda bu işlərə Gəncədə də başlanacağı gözlənilir.
Layihənin həyata keçirilməsində nailiyyətin əldə olunması ilə KfW Gəncə və Şəki şəhərlərində su təchizatı və kanalizasiya sisteminin bərpası layihəsinin ikinci fazası üçün əlavə maliyyələşdirmənin verilməsi məsələsi barədə Azərbaycan hökuməti ilə müzakirələrə başlamağı planlaşdırır.
Gəncə və Şəki şəhərlərində su təchizatı və kanalizasiya sisteminin tam bərpası üzrə tədbirlərin davam etdirilməsinə Almaniya hökuməti artıq 63 milyon avro ayrılmasını təsdiqləyib. Gəncənin su təchizatı sisteminin tam bərpası üçün əlavə maliyyələşmədən bank ikinci mərhələnin həyata keçirilməsinə 30 milyon avroluq ümumi dəyərlə 23 milyon avro ayırmağı planlaşdırır. Üçüncü mərhələdə bank axar sular üçün müasir təmizləyici qurğuların quraşdırılmasına 40 milyon avro ayırmağı planlaşdırır.
Layihənin həyata keçirilməsi 3 il yarıma hesablanıb. Birinci mərhələ Şəkinin su ilə 100 faiz, Gəncənin isə 50 faiz təminini təzərdə tutur. Gəncənin su təchizatı sisteminin gələcək inkişafı ikinci mərhələ çərçivəsində nəzərdə tutulur.
Layihə Gəncə və Şəki şəhərlərinin su təchizatı və kanalizasiya sistemlərinin keyfiyyətinin və etibarlılığının yaxşılaşdırılmasını nəzərdə tutur. Layihənin birinci mərhələsinin büdcəsi 55 milyon avro təşkil edir. 2006-cı ilin oktyabında Berndə imzalanan sazişə uyğun olaraq, KfW layihənin həyata keçirilməsi üçün 37 milyon avro məbləğində kredit, İsveçrənin İqtisadi Əməkdaşlıq üzrə Dövlət Katibliyi (SECO) qrant qismində 10 milyon avro ayırıb. Layihədə Azərbaycan hökumətinin payı 8 milyon avro təşkil edir. SECO-nun vəsaitləri hesabına konsaltinq xidmətləri və Şəkidə infrastrukturun qismən bərpası nəzərdə tutulub.