Azərbaycan, Bakı, 6 aprel /Trend, müxbir N.İsmayılova/
Cari ilin yanvar-mart ayları ərzində ölkənin Milli Bankı yanında fəaliyyət göstərən Azərbaycan İpoteka Fondunun (AİF) xətti ilə 17,2 milyon manat məbləğində ipoteka krediti verilib. Bu barədə çərşənbə günü AİF-dən bildirilib.
Banklar tərəfindən əvvəllər verilən kreditlərin təkrar maliyyələşdirilməsinin ümumi həcmi 15,2 milyon manat təşkil edir. 2011-ci ilin dövlət büdəcəsində sosial ipotekaların maliyyələşdirilməsi üçün nəzərdə tutulmuş 14 milyon manat həcmində məbləğ hələ ayrılmayıb.
Gənclərin və gənc ailələrin (borc alanların 41 faizi 18-29 yaşda, 31 faizi isə 30-35 yaşda olub) payına verilən ümumi kreditlərin 72 faizi düşür. Kreditlərin 28 faizi 36 yaşdan yuxarı borc alanların payına düşür.
AİF-in şərtlərinə görə, Azərbaycanda adi ipotekanın verilməsinin maksimum həddi 50 min manat təşkil edir və səkkiz faiz dərəcə ilə 25 il müddətinə verilir. Sosial ipoteka 35 min manat təşkil edir və dörd faiz dərəcə ilə 30 il müddətinə verilir. Adi və güzəştli kreditlər üçün ilkin ödəniş 15 faizdir.
Kreditlər milli valyutada - manatla və yalnız Azərbaycan vətəndaşlarına verilməlidir, ipotekanın predmeti yalnız mənzil və şəxsi evlər ola bilər, ipoteka kreditinin məbləği ipoteka üçün girov qoyulan daşınmaz əmlakın bazar qiymətinin 85 faizini ötməməlidir, kreditə görə aylıq ödəniş borc alanın aylıq gəlirinin 70 faizini ötməməlidir.
Güzəştli şərtlər şəhid, milli qəhrəmanlar və məcburi köçkün ailələrinin üzvlərinə, ən azı üç il iş təcrübəsi olan dövlət qulluqçularına, elmlər namizədləri və doktorluq dərəcəsi olanlara, idman sahəsində xüsusi xidmətləri olan şəxslərə, həmçinin, maksimum üç il xidmət stajı olan hərbçilərə şamil edilir.
Güzəştli ipoteka krediti alan hər ailə bundan yalnız bir dəfə istifadə edə bilər.
Bu gün 22 bank İpoteka Fondunun müvəkkil banklarıdır.
Aprelin 6-na olan rəsmi məzənnə 0, 7924 AZN/USD təşkil edir.