Azərbaycan, Bakı, 7 aprel /Trend, müxbir N.İsmayılova/
Azərbaycanda qızıl istehsalçısı "Anglo Asian Mining Plc" şirkətinin bir il ərzində borcları iki dəfədən çox - 46 milyon dollardan 22 milyon dollaradək azalıb. Bu barədə cümə axşamı şirkətin məlumatında deyilir.
"2011-ci ilin birinci rübü ərzində şirkət özünün əsas kreditoru olan Azərbaycan Beynəlxalq Bankına 8,6 milyon dollar verib ki, bununla da bank qarşısında 21 milyon dollaradək səviyyədə olan borcunu ödəyib", - məlumatda deyilir.
Şirkətin "Anglo Asian"ın icraçı direktoru Rza Vəziriyə bir milyon dollar məbləğində olan borcu da daxil olmaqla, rübün sonuna olan məlumata görə, şirkətin məcmu borcları 22 milyon dollar təşkil edir.
Şirkətin məcmu kredit və borcları 2009-cu il dekabrın 31-də 43 milyon dollar, 2010-cu ilin martında isə 45,9 milyon dollar təşkil edib.
"Anglo Asian Mining PLC" şirkəti 1997-ci ilin avqustunda Azərbaycan hökuməti ilə imzalanan PSA tipli hasilatın pay bölgüsü sazişi əsasında Azərbaycanın cənub-qərbində yerləşən altı - "Gədəbəy", "Ordubad", "Qoşa Bulaq", "Qızıl Bulaq", "Vejnəli" və "Söyüdlü" yataqlarının işlənməsi hüququna malikdir. Müqaviləyə əsasən, yataqlardan 400 ton qızıl, 2500 ton gümüş və 1,5 milyon ton mis hasil etmək planlaşdırılır.
İlk qızıl və gümüş 2009-cu ilin mayında "Gədəbəy" yatağından hasil edilib. Ümumilikdə, 2015-ci ilədək "Gədəbəy" yatağından 300 min unsiya qızılın hasil edilməsi planlaşdırılır.
