Azərbaycan, Bakı, 18 aprel /Trend, müxbir A.Axundov/
Özəl sektorun inkişafı üzrə İslam Korporasiyasının (ICD, İslam İnkişaf Bankı qrupuna daxildir ) təsis etdiyi Azərbaycanın "Ansar Leasing" lizinq şirkəti 2011-ci ilin sonunadək portfelinin həcmini 16-17 milyon dollara çatdırmağı planlaşdırır. Bu barədə bazar ertəsi Trend-ə şirkətin baş direktoru Ceyhun Nağıyev məlumat verib.
Onun sözlərinə görə, 2010-cu ilin sonlarına yığımların həcmi 8 milyon dollar təşkil edib. Şirkət 2009-cu il uyunun sonlarında fəaliyyətə başlayıb, ilk müqavilə isə oktyabrda bağlanıb.
"Bu gün şirkət 200-ə yaxın qüvvədə olan müqaviləyə malikdir", - Nağıyev bildirib.
Onun sözlərinə görə, portfelin 20 faizi daşınmaz əmlakın, 20 faizi nəqliyyat vasitələrinin, 20 faizi inşaat texnikasının, 20 faizi avadanlıqların lizinqinin, 20 faizi isə digərlərin payına düşür.
"Gələcəkdə şirkətin portfelində daşınmaz əmlakın lizinqinin payı artacaq, çünki bu daha az riskli istiqamətdir", - Nağıyev bildirib.
Onun sözlərinə görə, "Ansar Leasing"in nizamnamə kapitalının və təsisçilərin tərkibinin dəyişdirilməsi üzrə planlar yoxdur. Şirkət kapitalının səviyyəsinə görə (beş milyon manat) ölkənin ən kapitallaşdırılmış lizinq strukturudur.
Şirkətin yeganə təsisçisi kimi Özəl sektorun inkişafı üzrə İslam Korporasiyası çıxış edir ki, o indiyədək Azərbaycan iqtisadiyyatına təxminən 60 milyon manat investisiya qoyub. Azərbaycanda fəaliyyət göstərdiyi dövr ərzində ICD səkkiz bankla əlaqələr qurub, Azərbaycan Beynəlxalq Bankına, Rabitə Banka, UniBanka, Standard Banka, Turan Banka və digərlərinə kreditlər verib. Hazırda korporasiya ölkə üzrə portfelini 40 milyon dollaradək genişləndirməyi planlaşdırır.
Bununla yanaşı, ICD ölkədə özünün törəmə şirkəti olan "Caspian International Investment Company" (CIIC) vasitəsilə də sərmayələr yatırır .
Korporasiya 1999-cu ildə Ciddədə, İİB Direktorlar Şurasının 24-cü illik toplantısında yaradılıb. İCD-nin baş qərargahı Səudiyyə Ərəbistanının Ciddə şəhərindədir.
ICD-nin səlahiyyətlərinə üzv ölkələrin iqtisadi inkişafına şəriət prinsiplərinə uyğun özəl sektorun inkişafının dəstəklənməsi vasitəsilə yardım edilməsi daxildir. Özəl sektorun inkişafı üzrə İslam Korporasiyası özəl müəssisələrin yaradılması, genişləndirilməsi və modernləşdirilməsinə yardım edilməsi üçün hökumət və özəl qurumlara məsləhətlər də verir.
İİB 20 oktyabr 1975-ci ildə yaradılıb. Onun mənzil-qərargahı Ciddə şəhərindədir. Bankın regional ofisləri Rabatda, Kuala-Lumpurda var. İİB-in Almatıda da ofis var.
Aprelin 18-nə rəsmi məzənnə 0,7917 AZN/USD təşkil edir.
