Azərbaycan, Bakı, 18 may /Trend, müxbir A.Axundov/
Yaxın iki ildə Azərbaycanın daşınmaz əmlak bazarında əhəmiyyətli qiymət artımı gözlənilmir. Bu barədə Trend-ə "MBA Group" konsaltinq şirkətinin baş direktoru Nüsrət İbrahimov deyib.
"Qiymət artımı üçün müvafiq zəmin yoxdur. Bu bazar investorlar üçün cəlbedici olanda qiymətlər artır. Bu gün daşınmaz əmlakın alıcıları əsasən investorlar yox, mənzilə real ehtiyacı olan insanlar, gənc ailələr və başqalarıdır", - İbrahimov bildirib.
Onun sözlərinə görə, bu gün bank depozitlərinə kapital qoymaq daşınmaz əmlaka yatırım etməkdən sərfəlidir.
"Bank qoyuluşlarından gəlir ayda 1,1 faiz təşkil edirsə, daşınmaz əmlakdan gəlir 0,1-0,6 faiz təşkil edir. Bu baxımdan bank depozitləri daha sərfəlidir", - İbrahimov vurğulayıb.
