Azərbaycan, Bakı, 9 iyun /Trend, müxbir A.Axundov/
Uzunmüddətli perspektivdə mövcud iqtisadi inkişafın dəstəklənməsi üçün Azərbaycan qarşısında iki əsas vəzifə durur: neft-qaz gəlirlərindən effektiv istifadə və struktur islahatların keçirilməsi. Bunu Avropa Yenidənqurma və İnkişaf Bankının (AYİB) Azərbaycandakı nümayəndəliyinin rəhbəri Frensis Deley bildirib.
"Azərbaycan ortamüddətli perspektivdə inkişaf edəcək, firavan olacaq və varlanacaq, lakin bununla yanaşı, diqqətdən kənarda qalmaq olmaz, həvəsləndirilmək və ölkənin qeyri-neft sektorunun güclü inkişafına nail olmaq lazımdır", - Deley bildirib.
Onun sözlərinə görə, ikincisi, vətəndaş cəmiyyətini təşviq edəcək güclü institutlar, effektiv parlament, həmçinin güclü və müstəqil məhkəmə sistemi yaratmaq vacibdir ki, bu da sahibkarlığın gələcək inkişafını dəstəkləməyə imkan verəcək.
"Üçüncüsü, xarici investisiyaların cəlb edilməsidir. Belə ki, xarici investisiyalar təkcə pullar deyil, həm də innovasiya və təcrübədir, onlar yeni bazarlara çıxışı təmin edir, eləcə də rəqabəti artırır ki, bu da daha aşağı qiymətlərə daha yaxşı keyfiyyətdə mal və xidmətlərə gətirib çıxarır", - Deley bildirib.
"Mən əslən Belçikadan, təbii resursları olmayan kiçik ölkədənəm, lakin adambaşına ÜDM-in səviyyəsinə görə ölkə dünyanın aparıcı dövlətləri sırasındadır. Çünki biz çox açıq iqtisadiyyata malikik. Mən xarici kapitala malik olmayan bir dənə də iri Belçika şirkəti tanımıram. Bank sektoruna Fransa və Hollandiya bankları, şokolad sənayesinə isə Amerika və Türkiyə şirkətləri tərəfindən nəzarət edilir", - Deley bildirib.
AYİB 1991-ci ildən ölkədə fəaliyyətə başlayandan Azərbaycan iqtisadiyyatına 118 layihənin həyata keçirilməsi üçün 1,6 milyard dollar investisiya edib. Bankın cari portfeli bir milyard dollar təşkil edir.
İnvestisiyaların 48 faizi Azərbaycanın energetika sektoruna, 23 faiz isə korporativ sektora, 18 faizi maliyyə, 13 faizi infrastruktura yönəlib.
