Azərbaycan, Bakı, 20 iyun /Trend, müxbir İ.Xəlilova/
İyunun 26-dan 30-dək Ciddədə İslam İnkişaf Bankının İdarəedicilər Şurasının 36-cı illik iclası keçiriləcək. İclas çərçivəsində Azərbaycan hökuməti kredit sazişi imzalamağı planlaşdırır. Bu barədə bazar ertəsi ölkə hökumətindən bildirilib.
"Hazırda inteqrasiya olunmuş kənd təsərrüfatının inkişafı layihəsi üzrə kredit sazişinin imzalanması üçün səlahiyyətin alınması gözlənilir. Çatdırsaq, onun Ciddədə imzalancağı gözlənilir", - mənbə deyib.
Layihənin ümumi dəyəri 103,8 milyon dollardır. İİB 66,4 milyon dollar ayırıb. İİB krediti üç hissədən ibarətdir, onlardan ikisi güzəştli şərtlərlədir: 14,9 milyon dollar illik 2,65 faizlə beş illik güzəşt dövrü olmaqla 20 illiyə verilir, iki milyon dollar bank xidmətlərinin ödənilməsindən 7 il azad edilməklə (ödəmə hələ müəyyən edilməyib) 25 il müddətinə, 48,7 milyon dollar istisna metodu ilə, yəni swap+1,2 faiz dərəcəsilə 3 il güzəşt dövrü olmaqla 15 illiyə verilir.
Kənd Təsərrüfatının İnkişafı üzrə Beynəlxalq Fond (IFAD) layihənin maliyyələşdirilməsi üçün 19,6 milyon dollar ayrılmasını bəyənib. Qalan vəsait isə Azərbaycan hökumətinin iştirak payına düşür.
Layihənin əhatə zonası Yevlax, Ağdaş, Şəki və Oğuzdur.
IFAD-ın Azərbaycanda reallaşdırdığı kənd təsərürfatı layihələri ilə oxşar olan bu layihəyə mikrokreditlərin verilməsi, su istifadəçiləri assosiasiyasının yaradılması, kanalizasiya sisteminin yaxşılaşdırılması, fermerlərin texnika, yemlə təmin edilməsi də daxil edilə bilər. Kredit komponenti IFAD kreditinə daxil ediləcək.
İllik iclas çərçivəsində İnvestisiya və ixrac kreditlərinin sığortalanması üzrə İslam Korporasiaysının XVIII illik iclasının, özəl sektorun inkişafı üzrə İslam Korporasiyasının XI Baş Assambleyasının, Beynəlxalq İslam Ticarət-Maliyyə Korporasiyasının VI Baş Assambleyasının və İnkişafa Həmrəylik üzrə İslam Fondunun IV illik iclasının keçirilməsi gözlənilir.
İİB-in İdarəedicilər Şurasının iclasında İİB-in 56 üzv ölkəsinin yüksək vəzifəli şəxsləri iştirak edəcəklər, strukturların illik hesabatları dinləniləcək və növbəti illər üçün fəaliyyət istiqamətləri müəyyən ediləcək.
Azərbaycan 1992-ci ildən İslam İnkişaf Bankının üzvüdür və bu günə İİB-in ölkə üzrə portfeli 540 milyon dolları ötür [mayda 64,83 milyon dollar məbləğində təsdiqlənən Naxçıvanda daşqınların qarşısının alınması, becərilən ərazilərin modernləşdirilməsi və genişləndirilməsi layihəsi nəzərə alınmaqla]. Bu kredit iqtisadiyyatın müxtəlif sahələrində layihələrin həyata keçirilməsi üçün ayrılıb.
1997-ci ildən etibarən IFAD Azərbaycanda kənd təsərrüfatının inkişafı sahəsində bir sıra proqramlar həyata keçirib.
IFAD-ın Azərbaycanda 5 layihənin həyata keçirilməsinə investisiyalarının ümumi həcmi 67,7 milyon dollar təşkil edir. Bu vəsaitlər ümumilikdə 192,5 milyon dollar cəlb etməyə imkan verib.
Fond 2010-2015-ci illərdə yeni layihələr həyata keçirməyə artıq hazır olduğunu bildirib.
