Azərbaycan, Bakı, 21 iyun /Trend, müxbir N.İsmayılova/
Azərbaycan bankı "Turan Bank" 2012-ci ildən etibarən islam bankçılığı məhsullarının tətbiqinə başlamaq niyyətindədir. Bu barədə çərşənbə axşamı Trend-ə bankın Müşahidə Şurasının sədri Fuad Musayev deyib.
"İndi biz məsləhətçinin cəlb edilməsi mərhələsindəyik, çünki Azərbaycan qanunvericiliyi bu məhsulların tətbiqini məhdudlaşdırır. Hazırda Bəhreyn, Malayziya, Böyük Britaniya və digər ölkələrin məsləhətçiləri ilə danışıqlar aparılır", - Musayev bildirib.
Onun sözlərinə görə, bank daha çox sadə məhsulların tətbiqinə başlamağı planlaşdırır, çünki bu, fəaliyyətin yeni istiqamətidir və onu həm bank özü, həm də onun müştəriləri öyrənməlidir.
"Biz bu xidmətlərin göstərilməsinə artıq gələn ildən başlamağı planlaşdırırıq. Bankın hüquqşünasları yerli qanunvericiliyi də öyrənirlər və qanunvericiliklə islam bankçılığı məhsullarının bir araya gətirilməsi məsələsi üzərində işləyirlər", - o qeyd edib.
Hazırda bu növ xidmətin göstərilməsinə başlayan ilk Azərbaycan bankı "Nikoli Bank"dır. İslam bankçılığı xidmətlərinin göstərilməsi ilə bağlı niyyətlərini Azərbaycan Beynəlxalq Bankı, "Amrahbank", "Texnikabank" da bildiriblər.
"TuranBank" 1992-ci ildə yaradılıb. Bankın 25 səhmdarı var. Onların beşi hüquqi şəxs (21,8 faiz), 20-si isə fiziki şəxsdir (78,2 faiz).
