Azərbaycan, Bakı, 30 iyun /Trend, müxbir A.Axundov/
Dövlət Sığorta Nəzarəti Xidməti başqa şirkətlərin yeni həyat sığortası şirkətləri yaratmaq haqqında təkliflərinə baxdıqları vaxtda Azərbaycanda üç mövcud həyat sığortası şirkəti tərəfindən icbari sığorta bazarının ələ keçirilməsi həmin şirkətlərin bu bazarda portfeli artırmaq şanslarını azaltmır. Bu barədə Trend-ə bazar iştirakçılarından biri Qafar Məcidov bildirib.
Əvvəllər Azərbaycan Sığortaçılar Assosiasiyasının icraçı direktoru olan Qafar Məcidovun namizədliyi "Ata Sığorta" şirkətinin açmağı planlaşdırdığı yeni həyat sığortası şirkətinin idarə heyətinin sədri vəzifəsinə irəli sürülüb.
2011-ci ildə "İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında" qanunun tətbiqinə başlanıb.
"Öz işçilərini sığorta edən şirkət bir ildən sonra öz müqavilələrinə yenidən baxa bilər və başqa sığorta şirkətini seçə bilər. Bu bazarda şirkətlər daha sərfəli qiymətlər və daha keyfiyyətli xidmətlər təklif etməklə rəqabət aparacaqlar", - Məcidov deyib.
Onun sözlərinə görə, həyat sığortası bazarı yalnız istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta ilə məhdudlaşmır.
"Gələcək könüllü sığortanındır. Avropada bazarın 60-70 faizi könüllü sığortanın payına düşür", - Məcidov deyib.
Bu gün Azərbaycanda istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta üzrə xidmətlər göstərmək üçün lisenziyaya malik cəmi üç şirkət - Atəşgah Həyat, Paşa Həyat və Qala Həyat şirkətləri fəaliyyət göstərir.
Hazırda DSNX həyat sığortası şirkəti yaratmaq üçün AzSığorta, Alfa Sığorta, Ata Sığorta, Standard Insurance şirkətlərindən daxil olan müvafiq sənədləri yenidən işlənmək üçün şirkətlərə qaytarıb. Beynəlxalq Sığorta Şirkəti, "Azərbaycan Sənaye Sığorta" SŞ-nin də analoji planları var.
2011-ci ilin yanvar-mayında Azərbaycandakı həyat sığortası şirkətlərinin istehsalatda peşə xəstəlikləri və bədbəxt hadisələr nəticəsində peşə əmək qabiliyyətinin itirilməsi hallarından icbari sığorta üzrə sığorta haqları 11,941 milyon manat olub. Bu, yanvar-apreldəki göstəricini 37,12 faiz ötür.
Yanvar-mayda Azərbaycanda həyat sığortası üzrə sığorta haqlarının həcmi 1 343 786,04 manat (yığımların ümumi həcminin 1,55 faizi), ödənişlər isə 77 273,58 manat (0,35 faiz) olub.
Könüllü Life-sığorta yığımları strukturunda böyük hissəni 949 574,69 manat məbləğində yığım həyat sığortası üzrə mükafatlar təşkil edib, ödənişlər 12 778 manat olub.
Ölüm hallarından sığorta mükafatları 394 211,35 manat, ödənişləri 64 495,58 manat olub.
İyunun 30-na olan rəsmi məzənnə 0,7867 AZN/USD təşkil edir.