Azərbaycan, Bakı, 4 iyul /Trend, müxbir İ.Xəlilova/
Avqustun sonunadək Azərbaycan bankı "Texnikabank"ın baş ofisi İsveçrənin "Temenos" şirkətinin müasir T24 proqram təminatına tam keçəcək. Bu barədə bazar ertəsi Trend-ə bankın idarə heyətinin sədri Samir Hüseynov deyib.
"Sınaq üçün bank Bakı üzrə 3 iri filialında "Temenos" şirkətinin T24 proqramını tətbiq edib. Avqustun sonunadək baş ofis yeni proqram təminatına keçdikdən sonra biz bu proqramı hər ay bankın 4-5 filialında quraşdırmağı planlaşdırırıq", - Hüseynov qeyd edib.
Onun sözlərinə görə, bundan başqa, "Texnikabank"ın yeni şöbə və filialları artıq "Temenos" şirkətinin proqram təminatı əsasında yaradılacaq.
Bugünə bankın ölkə üzrə 35 filialı və dörd şöbəsi var, lakin ilin sonunadək onların sayını 15-ə çatdırılması planlaşdırılır.
Yeni prqoram təminatı bütün bank əməliyyatlarının avtomatlaşdırılmasını təmin edəcək, xidmətlərin göstərilməsinin və sövdələşmələrin bağlanılmasının sürətini xeyli artıracaq, eləcə də yeni bank məhsullarının və xidmətlərinin daha operativ və səmərəli tətbiqi üçün əsas yaradacaq.
Temenos T24 sistemi bütün bank əməliyyat sistemlərini, həmçinin valyuta mübadiləsi, kredit, depozit, fond, valyuta bazarı, ticari maliyyə, qiymətli kağızlar, aktivlərin idarə olunması, kassa-hesablama əməliyyatlarını əhatə edən geniş modul yığımını özündə birləşdirir.
İsveçrənin "Temenos" şirkəti Azərbaycan bankları ilə əməkdaşlığı genişləndirir.
T24 proqram təminatı Azərbaycan Mərkəzi Bankında istifadə olunur. Şirkət kommersiya banklarından Bank Standart, AGBank, Texnikabank, Əmrahbankla əməkdaşlıq edir. Bank Standart 2008-ci ildə "Arena" filialında T24 sistemini yaradaraq Azərbaycanın bank sektorunda bu proqramdan ilk dəfə istifadə edib və ötən il bank onun tətəbiqini tam başa çatdırıb.
Şirkətin MDB və Baltikyanı ölkələr üzrə baş direktoru Sergey Metelskinin ötən il Bakıda səfərdə olan zaman dediyinə görə, Azərbaycan şirkətlər üçün prioritet bazardır və əməkdaşlıq etdikləri bankların sayını gələcəkdə iki-üç dəfə artırmaq niyyətindədirlər.
