Azərbaycan, Bakı, 13 avqust /Trend, müxbir İ.Xəlilova/
Asiya İnkişaf Bankı (AİB) Masallı-Astara avtomobil yolunun inşası üçün əlavə maliyyələşdirməni vermək məqsədilə Azərbaycan hökuməti ilə sentyabrda danışıqların keçirilməsini gözləyir. Bu barədə bankın Bakı nümayəndəliyindən deyiblər.
"Danışıqlar avqustda gözlənilirdi, lakin texniki detalların dəqiqləşdirilməsi ilə əlaqədar biz onu bu ay keçirməyi çatdırmarıq", - nümayəndəlikdən qeyd ediblər.
Xüsusilə, avtomobil yolunun ətrafında torpaqların alınması, ətraf mühitə təsir üzrə plan yenilənir. Bundan başqa, hazırda avtomobil yolunun ikinci və üçüncü ərazisi üçün podratçı seçilir. Tender proseduru başa çatıb, indi təkliflər qiymətləndirilir.
"Layihənin son dəyəri, o cümlədən AİB-in kreditinin məbləği yolun iki hissəsi üçün podratçının müəyyənləşdirilməsi üzrə tender proseduru başa çatdıqdan sonra dəqiqləşəcək", - bankın nümayəndəliyindən deyiblər.
AİB layihənin həyata keçirilməsinə əlavə olaraq 160-170 milyon dollar ayıracaq.
Uzunluğu 22,15 kilometr olan Masallı-Astara avtomagistralının birinci hissəsinin tikintisi üçün "Azərinşaatservis" tikinti şirkəti seçilib.
Masallı-Astara yolunun yenidən qurulmasına bank artıq 200 milyon dollar ayırıb, Azərbaycan hökumətinin iştirak payı 49 milyon dollar təşkil edir.
Layihənin bahalaşması ilə əlaqədar məsləhətçi 2008-ci ildə hazırlanan xərclər smetasına müvafiq dəyişikliklər etməlidir. Layihənin yenidən qiymətləndirilməsindən sonra onun dəyəri 400 milyon dolları ötə bilər.
Maliyyələşmə Azərbaycandakı yol layihələri üçün 2007-ci ilin avqustunda 500 milyon manat məbləğində təsdiqlənmiş üçüncü multitranş paketindən (Multitranche Financing Facility - MFF) həyata keçiriləcək. Əvvəllər MFF-nin üçüncü krediti Gəncə-Qazax avtomobil yolunun şərq-qərb hissəsinin modernləşdirilməsi üçün nəzərdə tutulmuşdu.
Layihənin həyata keçirilməsinin yubanması səbəbindən AİB Aərbaycanın Masallı-Astara avtomobil magistarlının bir hissəsinin yenidən qurulması layihəsi çərçivəsində kredit vəsaitlərindən istifadə müddətini 31 dekabr 2013-cü ilədək uzadıb. 2008-ci ilin yanvarında kredit sazişi qüvvəyə minəndən bəri 2,5 il ərzində kredit resursları demək olar istifadəsiz qalıb və onlardan istifadə müddəti 30 iyun 2010-cu ildə bitib.
AİB-in multitranş paketindən artıq 255,4 milyon dollar ayrılıb. 200 milyon dollar məbləğində olan birinci tranş Masallı-Astara avtomobil yolunun tikintisinə, ikincisi isə (55,4 milyon dollar) Gəncə dairəvi yolunun yenidən qurulmasına ayrılıb.
MFF-nin bütün paketinin mənimsənilməsi 2014-cü ilədək nəzərdə tutulub.