Azərbaycan, Bakı, 15 avqust /Trend, müxbir N.İsmayılova/
Yanvar-iyul aylarının yekunlarına görə, Azərbaycanda orta aylıq əməkhaqqının məbləği 352,7 manat təşkil edib ki, bu da ötən ilin müvafiq dövr göstəricisindən 10,3 faiz çoxdur. Bu barədə Trend-ə Dövlət Statistika Komitəsindən bildirilib.
Ən yüksək əməkhaqqı mədən, maliyyə və sığorta fəaliyyəti, informasiya və rabitə, elmi və texniki fəaliyyət sahələrində, eləcə də tikinti sektorunda işləyənlərdə qeydə alınıb.
Yanvar-iyulda adambaşına düşən nominal gəlir 1 810,2 manat təşkil edib ki, bu da ötən ilin müvafiq dövr göstəricisini 15,8 faiz ötür. Adambaşına düşən real pul gəliri 17,1 faiz artımla 1 665,1 manat təşkil edib.
Yanvar-iyulda Azərbaycan əhalisinin nominal pul gəliri 16 milyard 337,5 milyon manat olub ki, bu da ötən ilin göstəricisindən 17,3 faiz çoxdur. Bu dövrdə əhalinin real pul gəlirləri 18,7 faiz artımla 15 milyard 27,7 milyon manata çatıb.
Hesabat dövründə əhali malların alınması və xidmətlərə şəxsi gəlirlərinin 66,3 faizini, vergilər, digər icbari ödənişlər və könüllü üzvlük haqlarının ödənilməsinə 8 faiz sərf edib və 23,9 faiz yığıma gedib.
Avqustun 15-nə olan rəsmi məzənnə 0,7866 AZN/USD təşkil edir.
