Azərbaycan, Bakı, 23 avqust /Trend, müxbir A.Axundov/
Azərbaycanda işləyən "AtaHolding" şirkətlər qrupu gələcək beş il üçün inkişaf strategiyasını hazırlayır. Bu barədə Trend-ə çərşənbə axşamı holdinqin Müşahidə Şurasının rəhbəri Əhməd Erentok deyib.
"İlin sonuna bütün holdinqin, o cümlədən bankın beşillik inkişaf strategiyası hazır olacaq", - Erentok bildirib.
Onun sözlərinə görə, strategiyanın əsas inkişaf istiqaməti bank sektorunun və kənd təsərrüfatının inkişafıdır.
"Biz artıq bir neçə ildir xərclərə nəzarət, yəni xərc və investisiyaların optimallaşdırılması, eləcə də əldə olunan nəticələrin qorunması siyasətinə sadiqik. Yeni strategiyada da bu istiqamətlər olacaq", - Erentok bildirib.
Onun sözlərinə görə, holdinqin tərkibində 31 şirkət işləyir. Onlardan 20-yə yaxını aktiv fəaliyyət göstərir.
"Şirkətlrədən hər biri öz strategiyasını hazırlayır, sonradan onu holdinqin startegiya üzrə komitəsinə verir. Burada strategiyanın son variantı hazırlanır. Bundan sonra Müşahidə Şurası tərəfindən təsdiqlənir. Strategiyanın hazırlanmasına heç bir məsləhətçi cəlb edilməyib", - Erentok qeyd edib.
2003-cü ildən etibarən fəaliyyətə başlamış "AtaHoldinq" ASC iqtisadiyyatın müxtəlif sahələrində investisiya qoyuluşunu, maliyyə vəsaitlərinin, habelə intellektual sərvətlərin idarə olunmasını və korporativ idarəetməni həyata keçirir. Holdinqin nizamnamə kapitalı 83,9 milyon manat təşkil edir və əsasən maliyyə, informasiya texnologiyaları, sənaye və turizm sahələrinin inkişafına yönəlib.
Avqustun 23-nə olan rəsmi məzənnə 0,7863 AZN/USD təşkil edir.
