Azərbaycan, Bakı, 23 avqust /Trend, müxbir A.Axundov/
Azərbaycanın "Fidan Sığorta" şirkəti ölkənin sığorta bazarını tərk etmək niyyətində deyil. Bu barədə Trend-ə şirkətin aparıcı mütəxəssisi Əli Vəliyev deyib.
Azərbaycan Maliyyə Nazirliyi yanında Dövlət Sığorta Nəzarəti Xidməti tərəfindən "Fidan Sığorta" ASC-nin lisenziyasının qüvvəsi dayandırılıb. Xidmətin məlumatında qeyd olunur ki, bu qərar sığortaçının maliyyə sabitliyi və ödəmə qabiliyyəti normativlərinə əməl olunmasının təmin edilməsi barədə dövlət sığorta nəzarəti orqanı tərəfindən verilən təqdimatları icra etməməsi ilə əlaqədar qəbul edilib.
"Şirkətə Dövlət Sığorta Nəzarəti Xidmətindən daxil olan məktubda bu qərar onunla izah edilir ki, şirkətin nizamnamə və məcmu kapitalının indiki səviyyəsi Maliyyə Nazirliyinin tələblərinə cavab vermir", - Vəliyev qeyd edib.
Onun sözlərinə görə, bununla əlaqədar yaxın iki-üç ayda şirkət kapitalı nazirliyin minimal tələblərinə uyğun səviyyəyə çatdırmağı planlaşdırır.
2011-ci il yanvarın 1-nə Maliyyə Nazirliyinin sığortaçıların nizamnamə kapitalına olan minimal tələbi 3 milyon manat, gələn ilin əvvəlinə 4 milyon manat təşkil edir. "Fidan Sığorta" şirkətinin nizamnamə kapitalı 2,26 milyon manat təşkil edir.
Təsisçisi bir hüqüqi və iki fiziki şəxs olan "Fidan Sığorta" ASC Azərbaycanda 1994-cü ildən fəaliyyət göstərir.
Avqustun 23-nə olan rəsmi məzənnə 0,7863 AZN/USD təşkil edir.
