Azərbaycan, Bakı, 2 sentyabr /Trend, müxbir N.İsmayılova/
Sentyabrın sonunda nəqliyyat sahəsindəki layihələrin rəhbəri Jak Bürenin başçılığı ilə Dünya Bankının (DB) missiyası Azərbaycanda həyata keçirilən yol layihələrini nəzərdən keçirməyə başlayacaq. Trend-in məlumatına görə, bu barədə cümə günü bankın Bakı nümayəndəliyindən bildirilib.
Bankın nümayəndə heyəti Bakı-Şamaxı-Muğan avtomobil yolunun genişləndirilməsi layihəsi çərçivəsində ikizolaqlı yoldan dördzolaqlı yola keçilməsi və Ələt-Masallı üçüncü magistralının və Hacıqabul-Bəhramtəpə yolunun yenilənməsini də əhatə edən ikinci yol layihəsindəki işlərin gedişatı ilə tanış olacaq.
Bakı-Şamaxı-Muğan avtomobil yolunun ikizolaqlıdan dördzolaqlıya genişləndirilməsini nəzərdə tutan kredit sazişi 11 avqust 2010-cu ildə Bakıda imzalanıb. Bank layihənin maliyyələşdirilməsinə qarışıq kredit şəklində 241,6 milyon dollar ayıracaq. Onlardan 70 milyon dollar Beynəlxalq İnkişaf Assosiasiyasının (BİA DB qrupuna daxildir) 2010-cu maliyyə ili üçün Azərbaycana kvotasının güzəştli şərtləri əsasında nəzərdə tutulub. 171,6 milyon dollar Beynəlxalq Yenidənqurma və İnkişaf Bankının xətti ilə ayrılacaq. Layihənin ümumi dəyəri 302 milyon dollar (ƏDV-siz) və ya 356,15 milyon dollar (ƏDV ilə) təşkil edir. Maliyyələşdirmənin qalan hissəsi - 184,55 milyon dollar dövlətin payına düşür.
Bakı-Şamaxı-Muğanlı yolunun uzunluğu 122 kilometrdir. Avtomobil yolunun 101 kilometri müzakirə edilən layihə çərçivəsində tikiləcək, qalan hissəsi isə artıq tikilib.
İkinci yol layihəsi DB-nin Direktorlar Şurası tərəfindən 2006-cı il yanvarın 17-də təsdiq edilib. Birinci komponentə üçüncü Ələt-Masallı magistral yolunun modernləşdirilməsi, Kürdəmir-Ucar yol bölməsinin, mövcud Bakı-Gürcüstan sərhədi magistral yolunun bərpası, mövcud Bakı-Şamaxı magistral yolunun bərpası, Tağıyev qəsəbəsi - Sahil qəsəbəsi (Bakıdan yan keçməklə) avtomagistalının yenidən qurulması və yaxınlıqdakı bir neçə yolun bərpası daxildir.
İkinci yol layihəsi çərçivəsində DB 200 milyon dollar məbləğində birinci krediti Beynəlxalq Yenidənqurma və İnkişaf Bankının şərtləri əsasında ayrılıb: 20 il müddətinə dörd ili güzəştli olmaqla və libor+0,5 faiz dərəcəsi ilə. Birinci fazanın həyata keçirilməsinə Azərbaycan hökuməti 65 milyon dollar ayırıb. DB 2009-cu ildə Hacıqabul-Bəhramtəpə avtomobil yolunun yenidən qurulması layihəsinin həyata keçirilməsinə əlavə 175 milyon dollar ayırıb. Bunun 63 milyon dolları güzəştli şərtlər əsasında verilib. Avtomobil yolunun uzunluğu 116 kilometrdir. İkizolaqlı yolun tikintisini nəzərdə tutan bu layihənin ümumi dəyəri orta hesabla 200 milyon dollar təşkil edir.
İkinci yol layihəsinin ümumi dəyəri 1027,99 milyon dollardır.
