Azərbaycan, Bakı, 22 sentyabr /Trend, müxbir İ.Xəlilova/
İslam İnkişaf Bankı (İİB) Azərbaycana ölkənin altı rayonunda su təchiazatı və kanalizasiya sistemlərinin təkmilləşdirilməsinə 200 milyon dollar vəsaitin ayrılmasını təsdiqləyib. Trend-in məlumatına görə, bu barədə cümə axşamı İİB-in Bakı Ofisindən deyiblər.
"Sentyabrın 17-dən bankın Direktorlar Şurasında Azərbaycanda su layihəsinin maliyyələşdirilməsi üçün kreditin ayrılması məsələsinə baxılmasına start verilib", - bankdan deyiblər.
Astara, Daşkəsən, Tərtər, Gədəbəy, Samux və Qazax rayonlarının su təchizatı və kanalizasiya sistemlərinin bərpasını nəzərdə tutan layihənin ümümi dəyəri texniki-iqtisadi əsaslanmaya uyğun olaraq, 270 milyon dollar təşkil edir.
İB layihənin ümumi dəyərinin 74 faizini, daha dəqiq desək, su təchizatı və kanalizasiya sisteminin yenidən qurulması, sutəmizləyici qurğuların dəyişdirilməsi, çirkab suların təmzilənməsi üzrə işlərin görülməsini maliyyələşdirməyi planlaşdırır.
Bu layihənin maliyyələşdirilməsi 2011-13-ci illər üçün yeni əməkdaşlıq proqramı çərçivəsində nəzərdə tutulur. Prqorama əvvəlcə su təchizatı və kanalizasiya üzrə iki layihə daxil edilmişdi. Onların hər biri üçün bank tərəfindən təxminən 110 milyon dolların ayrılması planlaşdırılmışdı, lakin sonradan bu iki layihənin bir iri layihədə birləşdirilməsi barədə qərar qəbul edilib.
Azərbaycan 1992-ci ildən İslam İnkişaf Bankının üzvüdür və bu günə İİB-in ölkə iqtisadiyyatının müxtəlif sahələri üzrə portfeli 700 milyon dollara çatır. Bank Azərbaycanda layihələrin maliyyələşdirilməsinə yanaşmasını dəyişərək bir layihə üçün verilən kreditin maksimal məbləğini təxminən beş dəfə artırıb. Əgər əvvəllər bir layihə üçün maliyyələşdirmənin limiti İİB tərəfindən 30-40 milyon dollar arasında müəyyən edilirdisə, indi bank bir layihə üçün 150 milyon dollaradək ayıra bilər.
