Azərbaycan, Bakı, 26 sentyabr /Trend, müxbir A.Axundov/
Avqust ayında Bakının torpaq bazarında təklif portfelinin həcmi 1,3 faiz artıb. Bu barədə Trend-ə bazar ertəsi "MBA Group" konsaltinq şirkətinin baş direktoru Nüsrət İbrahimov deyib.
"Bu artım əsasən bahalı torpaq sahələrinin sayının artması ilə əlaqəlidir", - İbrahimov bildirib.
Onun sözlərinə görə, təklif portfelində obyektin orta sahəsi avqustda 17,3 sot təşkil edib.
"Ay ərzində torpaq bazarına təklif olunan ümumi 813 ha torpaq sahəsinin 67 faizi boş sahə, qalanı isə qеyri-yaşayış sahələri və köhnə yaşayış sahələri təşkil еdib və qiymət indеksi isə ay ərzində 2,5 faiz artaraq 476,7 bənd səviyyəsində qərarlaşıb", - o deyib.
İbrahimovun sözlərinə görə, bir tərəfdən mülkiyyət hüquqlarının sənədləşdirilməsi prosesindəki aktivlik, digər tərəfdən isə mövsümi ayların davamı tikinti sektorunda canlanmaya və son nəticədə torpaq bazarında aktivliyin artımına şərait yaradıb.
"2011-ci ilin yay aylarında torpaq bazarında aktivlik şəhərin ətraf ərazilərində yüksək olub. Şəhərətrafı zonalarda, xüsusən də Suraxanı, Sabunçu, Binəqədi və Xəzər rayonlarının ərazilərində fərdi yaşayış evlərinin tikintisində artım müşahidə edilib", - İbrahimov deyib.
Onun sözlərinə görə, bazarda torpağın еkspozisiya müddəti 1,8% azalaraq 348 günə bərabər olub.
"Tələb mərkəzətrafı rayonlarda daha da yüksəkliyi ilə seçilib və qiymət indеksinin artımı əsasən yaşayış üçün yararlı torpaq sahələrində müşahidə edilib. Ümumən təklifin qıtlığı şəhərin mərkəzi ərazisində davam edir. Bu vəziyyət isə şəhərin mərkəzində torpaq sahələrinin azalması ilə izah olunur", - baş direktor deyib.