Azərbaycan, Bakı, 29 sentyabr /Trend, müxbir İ.Xəlilova/
Azərbaycanda ödənişli avtomobil yollarının tətbiqi imkanlarının araşdırılması üçün Asiya İnkişaf Bankının (AİB) ölkədə yol şəbəkəsinin inkişafına dair proqramı çərçivəsində məsləhətçi cəlb olunur. Trend-in məlumatına görə, bu barədə cümə axşamı bankın Bakı nümayəndəliyindən bildirilib.
"Məsləhətçi respublikada, xüsusən, Bakıda və ehtimal ki, magistral yollarda da pullu yolların tətbiqi üçün mövcud qanunvericiliyi öyrənəcək. Tədqiqatlar əsasında normativ-hüquqi aktlara dəyişikliklər edilməsi üzrə tövsiyələr hazırlanacaq", - nümayəndəlikdə deyiblər.
Bu tədqiqatlar hələ yollar layihəsi üçün 2007-ci ilin sonunda çoxtranşlı paketdən Masallı-Astara yolunun yenidən inşası üçün ayrılan 200 milyon dollarlıq birinci tranş çərçivəsində nəzərdə tutulub.
Məsləhətçi xidmətlərinin cəlb olunmasına dair müsabiqə cümə axşamı elan olunub.
Azərbaycan Nəqliyyat Nazirliyi nəzdindəki "Azəryolservis" ASC-nin məlumatına görə, məsləhətçi avtomobil yol şəbəkəsi, hərəkətin sıxlığı, yollardakı örtüyün vəziyyətinin öyrənilməsi istiqamətində araşdırmalar aparmalı və növbəti 10 il müddətində avtomobil yollarının təkmilləşdirilməsinə olan ehtiyacları müəyyən etməlidir.
Məsləhətçi hərəkət sıxlığına görə yol şəbəkəsini, onun region üzrə iqtisadi əhəmiyyətini, mövcud vəziyyətdən asılı olaraq ehtiyacları və layihələndirilən avtomobil yolundan istifadə edən nəqliyyat vasitələrinin qiymətləndirilməsini həyata keçirməlidir. Məsləhətçi iqtisadi baxımdan mühüm əhəmiyyət kəsb edən avtomobil yollarını qeydə almalı və sıralamaya uyğun qeydiyyat cədvəli hazırlamalıdır. Məsləhətçi tərəfindən ödənişli yollardan əldə olunacaq gəlirlərin hesablanmasına da xüsusi diqqət yetirilməli və dövlət-özəl sektor əməkdaşlığına əsaslanan layihələr üçün yüksək gəlir normasına malik avtomobil yolları nəzərə alınmalıdır.
"Azəryolservis" hazırda məsləhətçi firmaları təklif olunan xidmətlər üzrə maraqlarını bildirməyə dəvət edir. İxtisas göstəricilərini genişləndirmək üçün məsləhətçi firmalar assosiasiya şəklində maraqlarını ifadə edə bilərlər.
Nəzərdə tutulan işlər 2012-ci ilin yanvar ayından gec olmayaraq başlamalı və 2012-ci ilin iyun ayına qədər tamamlanmalıdır.
Maraqların ifadəsi oktyabrın 26-dan gec olmayaraq aşağıdakı ünvana çatdırılmalıdır:
"Azəryolservis", Bakı, Üzeyir Hacıbəyov küç., 72/4.
Əlavə məlumatı yerli vaxtla saat 10:00-dan 16:00-dək +994 12 493 00 45 nömrəli telefon, +994 12 493 46 65 nömrəli faks və ya [email protected] elektron ünvanından almaq olar.
