Azərbaycan, Bakı, 10 oktyabr /Trend/
Bakının ilkin mənzil bazarında qiymət artımına baxmayaraq, 2011-ci ilin sentyabrında payız üçün xarakterik olmayan passivlik müşahidə olunub. Bu barədə bazar ertəsi Trend-ə "MBA Group" konsaltinq şirkətinin baş direktoru Nüsrət İbrahimov bildirib.
"İpoteka kreditlərinin şərtlərinin yumşaldılması gözləntiləri bazara passivlik gətirib", - İbrahimov bildirib.
Onun sözlərinə görə, sentyabrda alqı-satqı agentliklərinə müraciətlərin sayında azalmalar müşahidə olunub.
"Bir çox hallarda bəzi tikinti şirkətlərinin sənədləşmə işlərini uzatması, əlavə vəsait tələb etməsi və ipoteka kreditlərinə etinasız yanaşmalar potensial müştəriləri qaçıdrdır", - o deyib.
İbrahimovun sözlərinə görə, sentyabr ayında yeni tikililərdə orta hesabla bir kvadratmetrin qiyməti 3,5 faiz, ötən ilin sentyabr ayı ilə müqayisədə 5,7 faiz artaraq 828 dollara çatıb.
Sentyabrda Bakıda 181 yeni tikilidə 900 mənzil bazara təqdim edilib.
"2011-ci ilin sentyabr ayında ilkin bazarda daşınmaz əmlakın qiymətlərinin artımı birbaşa olaraq ucuz mənzillərin tədricən satılması, bahalı mənzillərin təkliflər portfelində payının artması ilə bağlıdır. Buna görə də qiymətlər indeksi artıq stabillik və artım tendensiyasına malikdir", - İbrahimov deyib.
Onun sözlərinə görə, ilkin bazarda qiymətlər artıq reallığı əks etdirməyə başlayıb.
"Tikinti şirkətləri bazarda qiymətləri stabilləşdirməyə can atır, onların kredit portfelinin həcmi də artmaqda davam edir. Tikinti şirkətlərindən bəziləri tədricən öz maliyyə problemlərini həll edir, digərləri isə bazarı tərk edir", - İbrahimov bildirib.
Onun sözlərinə görə, müşahidələr bazarın özünün böhran vəziyyətinin sonlarını yaşadığını deməyə əsas verir.
...