...

Azərbaycan Bankı Gürcüstanda törəmə strukturun açılması ilə bağlı ilkin razılıq alıb

Biznes və iqtisadiyyat xəbərləri Materials 11 Oktyabr 2011 17:08

Trend-i buradan izləyin

Azərbaycan, Bakı, 11 oktyabr /Trend, müxbir İ.Xəlilova/

Azərbaycan bankı "Paşa Bank" mükəmməl bank kommersiya fəaliyyətinə lisenziya almaq üçün 2011-ci ilin sonuna qədər Gürcüstan Milli Bankına müraciət etməyi planlaşdırır. Bu barədə çərşənbə axşamı Trend-ə "Paşa Bank"ın idarə heyətinin sədri Fərid Axundov deyib.

"Biz Gürcüstan Milli Bankından törəmə bankın açılışı üçün ilkin (şifahi) razılıq almışıq, amma hələ rəsmi olaraq bu ölkənin nəzarət orqanına müraciət etməmişik, çünki hazırlıq işlərinin yekunlaşmasını gözləyirik. Hazırda bankın fiziki tikintisi və Gürcüstanda işçilərin hazırlanmasına hazırlıq gedir", - Axundov bildirib.

Axundov deyib ki, yaydan etibarən Gürcüstanın bank bazarında "Paşa Bank"ın nümayəndəliyi iştirak edir və çox güman ki, həmin nümayəndəlik törəmə banka çevriləcək.

"Hazırda bankın hüquqşunasları aktiv olaraq gələcək strukturu müzakirə edirlər və yaxın vaxtlarda ya filialın, ya da törəmə bankın açılması barədə yekun qərar qəbul ediləcək", - o deyib.

Paşa Bank-ın rəhbəri Gürcüstan bazarına çıxışın üç səbəbini - rəqabət, bank və korporativ sektorlarda xidmət və Private Banking xidmətinin göstərilməsini qeyd edib.

Axundovun fikrincə, Gürcüstanın bank bazarında rəqabət yetərincə sərtdir, bu da orada Azərbaycan banklarının olmaması deyil, bir çoxunun xarici səhmdarları olmaqla Gürcüstan banklarının institusional gücü ilə əlaqədardır.

"Gürcüstanın bank sisteminin kapitallaşdırılması da Azərbaycan banklarından daha yüksəkdir. Bununla yanaşı, Gürcüstan bazarında bizim çoxlu müştərimiz çalışır, ona görə də biz törəmə bank açmaqla onlara Gürcüstanda xidmət etməyi qərara almışıq", - Axundov bildirib.

"Gürcüstan bankları bir müddət əvvəl Private Banking xidməti sahəsində menecment komandası formalaşdırıblar. Buna görə də biz bu istiqamətdə o qədər də geridə qalmamışıq. Bizim özümüzə də bu bazarın nə təklif edəcəyi maraqlıdır", - Axundov deyib.

"Paşa Bank" 2007-ci ilin iyununda yaradılıb və Azərbaycan Mərkəzi Bankının lisenziyası əsasında 2007-ci il yanvarın 28-dən fəaliyyət göstərir.

"Paşa Bank" ASC "Paşa Sığorta" "Paşa Həyat", "Paşa Travel" və "Paşa Tikinti" ilə birgəı "Paşa Holdinq"in tərkibinə daxildir. Holdinq faktiki olaraq klassik holdinq yox, investisiya şirkətidir. "Pasha Group"un strukturuna "Kapital Bank" da daxildir. Orada holdinq səhmlərin 99,75 faizinə məxsusdur.

Bankın səhmdarları strukturunda pay bölgüsü bu şəkildədir: "Paşa Holdinq"ə səhmlərin 60 faizi, ADOR ltd şirkətinə 30 faiz, Arif Paşayevə 10 faiz məxsusdur.

Xəbər lenti

Xəbər lenti