Azərbaycan, Bakı, 18 oktyabr /Trend, müxbir A.Axundov/
Sentyabrda Bakıda ilkin mənzil bazarında qiymətlər ötən ayla müqayisədə dəyişməyərək bir kvadratmetr üçün 837 manat səviyyəsində qalıb. Bu barədə çərşənbə axşamı "Əmlak Bazarı İştirakçıları" İctimai Birlyindən məlumat verilib.
"İlin əvvəlinə qiymətlər 1,3 faiz azalaraq ötən ilin analoji dövrünə nisbətdə 3,3 faiz təşkil edib. Böhran dövrü ilə müqayisədə (2008-ci ilin sentyabrı) qiymətlər 29,9 faiz aşağı düşüb" , - təşkilatın məlumatında deyilir.
Əvvəlki aylarda ilkin mənzil bazarında qeydə alınmış fəallıq sentyabrda da qalıb.
Sentyabrda Bakıda tikilən, lakin hələ də satılmayan, eləcə də tikilməkdə olan yeni tikililərin sayı 426 ədəd olub. Ötən ayda bu göstərici 428 ədəd təşkil edib. Tikinti şırkətlərinin sayı isə 152 olub. Avqustda bu rəqəm 153-ə bərabər olub.
Sentyabrda qiymətlərin indeksi sabit qalaraq 320,7 bənd təşkil edib.
Sentyabrda ötən ayda olduğu kimi əksər mənzillər və yeni tikililər üçotaqlı olub. Avqustda yeni tikilidə birotaqlı mənzilin orta sahəsi 60.7 kvadratmetr, ikiotaqlıda 92,1 kvadratmetr olub. Üçotaqlı 131.8 kvadratmetr, dördotaqlı 182,9 kvadratmetr, beşotaqlı 238,3 kvadratmetr təşkil edib.
Oktyabrın 18-nə olan rəsmi məzənnə 0,7869 AZN/USD təşkil edir.
