Azərbaycan, Bakı, 1 noyabr /Trend, müxbir A.Axundov/
Azərbaycanda ilk iri fermer təsərrüfatları gələn il yaradılacaq. Trend-in məlumatına görə, bu barədə çərşənbə axşamı jurnalistlərə kənd təsərrüfatı naziri İsmət Abasov deyib.
"Mövcud məsələ hazırda gündəmdədir. Kənd Təsərrüfatı Nazirliyi onların yaradılması üçün İqtisadi İnkişaf Nazirliyi, icra hakimiyyəti orqanları, Dövlət Torpaq və Xəritəçəkmə Komitəsi və digər strukturlarla birgə işləyir", - nazir bildirib.
Abasovun bir qədər əvvəl dediyinə görə, ilkin mərhələdə ölkənin aran rayonlarının suvarılan 100 min hektar ərazisində iri təsərrüfatların yaradılması planlaşdırılır. Dövlət Torpaq və Xəritəçəkmə Komitəsi həmin torpaqların səmərəliliyinin yoxlanılması üzrə işlər aparır.
"Bu yoxlamalar başa çatdıqdan sonra biz hökumətdə müzakirələr aparacağıq, ardından onların yaradılması prosesinə start veriləcək", - Abasov deyib.
Onun sözlərinə görə, onların ilkin sayını söyləmək çətindir.
"Bu həmin təsərrüfatların sahəsindən asılıdır. Onların sayından daha çox səmərəliliyi önəm daşıyır", - Abasov bildirib.
