Azərbaycan, Bakı, 10 noyabr /Trend, müxbir N.İsmayılova/
Moody's beynəlxalq reytinq agentliyi Azərbaycan bankı Unibank-ın xarici və milli valyutada depozitlər üzrə uzunmüddətli B2 reytinq proqnozunu mənfidən sabitə dəyişib. Bu barədə dünən agentliyin saytında dərc olunmuş məlumatda deyilir.
Maliyyə davamlılığı muxtar reytinqi (BFSR) Е+ və Unibank-ın xarici valyutada depozitlərinin Not Prime qısamüddətli reytinqi əvvəlki səviyyədə təsdiqlənib.
Moody's-in məlumatında deyildiyi kimi, proqnozun dəyişdirilməsi 2011-ci ildə bankın gəlirliliyinin yaxşılaşmasının davamlı tendensiyası, onun aktivlərinin keyfiyyətinin sabitləşməsi və reytinq agentliyinin Unibank-ın bazarda öz payını bərpa edəcəyi, ortamüddətli perspektivdə onun aktivlərinin keyfiyyəti və mənfəətliliyinin kifayətləndirici qalacağı ilə bağlı gözləntilərlə əlaqədardır.
Moody's qeyd edir ki, 2011-ci ilin doqquz ayı ərzində Unibank-ın kredit portfeli təxminən 27 faiz artıb. Çünki bank bazarda əvvəlki mövqeyini bərpa etməklə Azərbaycanda kreditləşmə şərtlərinin yaxşılaşmasına cavab olaraq öz işgüzar aktivliyini artırıb.
Moody's 2011-ci ildə Unibank-ın gəlirliliyinin yaxşılaşdırılmasının davamlı tendensiyasını qeyd edib və bankın maliyyə nəticələrininin ortamüddətli perspektivdə kifayətləndirici qalacağına ümid edir.
Üç rübün yekunları üzrə Unibank-ın xalis mənfəəti 2010-cu ildəki 8 milyon manat səviyyəsindəki xalis ziyana qarşı 4,5 milyon manat (5,7 milyon dollar) təşkil edib. Moody 's-in fikrincə, ortamüddətli pespektivdə Unibank-ın gəlirliliyi kredit portfelinin artımı, bankın akrivlərinin keyfiyyətinin sabitləşməsi ilə dəstəklənəcək.
2011-ci il sentyabrın 30-na olan məlumata görə, işləməyən kreditlərin payı (müddəti 90 gündən çox ötmüş borclar) 2010-cu ildəki 16 faizdən 14 faizədək azalıb və 2011-2012-ci illərdə yeni kreditlərin verilməməsi və problemli kreditlərin ödənilməsi hesabına gələcəkdə tədricən azalacaq.
2010-cu il dekabrın 31-ə olan vəziyyətə görə, bankın ümumi aktivləri 465 milyon dollar təşkil edib.