Azərbaycan, Bakı, 16 noyabr /Trend, müxbir A.Axundov/
Azərbaycanın maliyyə imkanları büdcənin kəsirsiz həyata keçirilməsinə imkan verir. Lakin onun saxlanması ölkənin maliyyə sisteminin sabitliyi üçün lazımdır. Trend-in məlumatına görə, bu barədə çərşənbə günü maliyyə naziri Samir Şərifov parlamentin İqtisadi siyasət, Sosial siyasət, Təhlükəsizlik və müdafiə, Təbii ehtiyatlar, energetika və ekologiya, Aqrar siyasət komitələrinin 2012-ci il və sonrakı üç il üzrə dövlət və icmal büdcəsi layihəsinin müzakirələrində deyib.
"Dövlət büdcəsinin kəsiri bizə lazımdır. Çünki o, maliyyə sistemi, ilk növbədə, bank sistemi, sığorta şirkətləri üçün mühüm elementlərdən biridir. Çünki dövlət bankların onların sərəncamında olan izafi likvid vəsaitləri yerləşdirmək imkanına malik olması üçün dövlət qiymətli kağızlarını dövriyyəyə buraxır. Biz digər ölkələrdən fərqli olaraq, büdcə kəsirini ildən-ilə artırmırıq və onu qiymətli kağızların yerləşdirilməsindən əldə olunan vəsaitlər doldurmuruq", - nazir bildirib.
Onun sözlərinə görə, bunun nəticəsi həmin ölkələrdə müşahidə olunan problemlərdir, çünki onlar öz növbəsində müxtəlif büdcə xərclərini yeni pulların emissiyası yolu ilə ödəyirlər.
"Biz bu yolla getmirik və çalışırıq ki, büdcə xərclərimiz büdcə gəlirləri ilə ayaqlaşsın. Bununla yanaşı, biz müəyyən büdcə kəsirini nəzərə almalıyıq", - Şərifov deyib.
Onun sözlərinə görə, ölkənin mövcud büdcə kəsiri həm yerli daxilolmalar, həm də xarici bazarlar hesabına təmin edilə bilər.
"Biz həmişə xarici bazarda borc alətlərinin yerləşdirilməsindən istifadənin vacibliyi ilə bağlı müzakirələr aparırıq və bu, hər il büdcədə kəsirin təmin olunması mənbələrindən biri kimi qoyulur. Lakin biz dünya bazarlarındakı vəziyyəti izləyirik. Bizim kredit reytinqlərimiz artır və biz artıq beynəlxalq bazarlara çıxış üçün lazımi reytinqə malikik", - nazir deyib.
Bununla yanaşı, Şərifovun sözlərinə görə, bu gün bazarlardakı vəziyyət borc almaq üçün əlverişli deyil. "Məsələn, İtaliya kimi iri ölkələrdə borc faizləri kəskin artıb. Biz bu vəziyyəti öz maliyyə planlarımızda nəzərə almağa çalışırıq", - nazir deyib.
Qiymətli Kağızlar üzrə Dövlət Komitəsinin sədri Rüfət Aslanlının sözlərinə görə, 2011-ci ilin doqquz ayı ərzində dövlət büdcəsi kəsirinin təmin olunması üçün Maliyyə Nazirliyi 203 milyon manat həcmində qiymətli kağız yerləşdirib. Bu gün onun qalığı 108 milyon manat təşkil edib ki, bu da ötən ilin analoji dövründəki göstəricini 17 faiz ötüb.
"Bu gün dövlət büdcəsinə xaricdə dövlət borc alətlərinin yerləşdirilməsindən əldə olunan vəsait daxil olmayıb", - Aslanlı deyib.
Onun sözlərinə görə, Azərbaycan hökuməti borc götürülməsi limitini də azaltmaqda davam edir.
"2010-cu ildə bu limit 4,2 milyard manat səviyyəsində olub (bu zaman daxili borc götürülməsi limiti 1,7 milyard manat səviyyəsində olub), 2011-ci ildə 3,5 milyard manat səviyyəsində (1,2 milyard manat), 2012-ci ildə isə 3 milyard manat səviyyəsində (bir milyard manat) nəzərdə tutulub", - Aslanlı qeyd edib.
Noyabrın 16-na rəsmi məzənnə 0,7866 AZN/USD təşkil edir.