Azərbaycan, Bakı, 16 noyabr /Trend, müxbir E.İsmayılov/
Gələn ilin yanvarından Azərbaycan Nəqliyyat Nazirliyi Bakı şəhərinin sərnişin avtobuslarında turniket-kart ödəniş sisteminın tədricən tətbiqinə başlamağı planlaşdırır. Bu barədə çərşənbə günü Trend-ə nazirlikdəki mənbə deyib.
Onun sözlərinə görə, yeni sistemin tətbiqi artıq bu ilin dekabrında istismara verilməsi planlaşdırılan Bakıda nəqliyyatın intellektual idarə edilməsi sisteminin tətbiqinin başlanması ilə əlaqəlidir.
"Hazırda bu istiqamətdə işlər aparılır ki, ilin əvvəlindən yeni sistemin tətbiq edilməsinə başlansın", - mənbə deyib.
Nazirliyin Nəqliyyat siyasəti və iqtisadiyyatı şöbəsinin müdiri Sədrəddin Məmmədovun əvvəl dediyinə görə, növbəti ildən ictimai nəqliyyatdan istifadəyə görə vahid ödəniş xidməti sisteminin tətbiqi mümkündür. Bununla əlaqədar olaraq, nazirlik onun nəqliyyatın intellektual idarə edilməsi sistemi ilə inteqrasiyası üzrə xüsusi proqram hazırlayıb.
Mənbənin sözlərinə görə, nəqliyyatın intellektual idarə edilməsi çərçivəsində də Bakıda sərnişin nəqliyyatının səmərəli işini təmin etmək məqsədilə bir sıra az səmərəli avtobus marşrutlarının azaldılması planlaşdırılır.
Nəqliyyat Nazirliyi 2014-2015-ci ilə qədər Bakıdan savayı, Abşeron yarımadasını və ölkənin digər regionlarını əhatə edəcək nəqliyyatın intellektual idarə edilməsi sistemini tam istismara verməyi planlaşdırır.
Sistem çərçivəsində avtobus dayanacaqları üçün 639-a yaxın, taksilər üçün 140-a yaxın meydançanın yaradılması planlaşdırılır. Bu işlər Azərbaycan yol polisi və intellektual sistemin hazırlanması prosesində iştirak edən Cənubi Koreya mütəxəssisləri ilə birgə aparılır.
İntellektual sistem 150-yə yaxın yeni elektron tipli işıqforun quraşdırılmasını nəzərdə tutur.
Nəqliyyatın intellektual idarə edilməsi sisteminin yaradılması layihəsinin dəyəri 110 milyon manat civarında qiymətləndirilir.
