Azərbaycan, Bakı, 17 noyabr /Trend müxbir A.Axundov/
Azərbaycanın xaricdəki səfirliklərinin və diplomatik nümayəndəliklərinin sayı 2012-ci ildə 73-ə çatacaq.
Trend-in məlumatına görə, bu barədə cümə axşamı Milli Məclisin Mədəniyyət, Elm və təhsil, Hüquq siyasi və dövlət quruculuğu, Regional məsələlər, İnsan hüquqları, Beynəlxalq münasibətlər və parlamentlərarası əlaqələr komitələrinin 2012-ci ilin dövlət büdcəsi layihəsinin müzakirəsinə həsr olunmuş birgə iclasında Beynəlxalq münasibətlər və parlamentlərarası əlaqələr komitəsinin sdəri Səməd Seyidov deyib.
"2012-ci ildə xaricdə diplomatik nümayəndəliklərin maliyyələşdirilməsi xərcləri artacaq. 2012-ci ilin dövlət büdcəsində 73 səfirliyin və diplomatik nümayəndəliyin xərcləri yer alıb" , - Seyidov əlavə edib.
Hazırda Azərbaycanın xaricdə 65 səfirliyi və diplomatik nümayəndəliyi fəaliyyət göstərir.
"Ölkənin daha səkkiz diplomatik nümayəndəliyinin açılması haqqında razılıq artıq əldə edilib, bunun gələn il həyata keçirilməsi gözlənilir" , - Seyidov bildirib.
Azərbaycan Braziliya, Oman, Tailand və digər ölkələrdə səfirlik açmağı planlaşdırır.
2011-ci ildə Argentina, Liviya, CAR, Xorvatiyada səfirliklər, Batumi (Gürcüstan), Yekaterinburq (Rusiya) və Aktauda (Qazaxıstan) isə baş konsulluqlar açılıb.
Seyidovun sözlərinə görə, Azərbaycan beynəlxalq təşkilatlarda bütün maliyyə öhdəliklərini yerinə yetirir.
Azərbaycanın beynəlxalq arenada fəaliyyətini uğurla davam etdirə bilməsi və beynəlxalq təşkilatlarda üzvlük haqlarının ödənilməsi məqsədilə 2012-ci ildə 100,6 milyon manat ayrılması nəzərdə tutulub ki, bu da 2011-ci illə müqayisədə 1,8 faiz və ya 1,8 milyon manat çoxdur.
Azərbaycanın 65 səfirliyinin və konsulluğunun saxlanması xərcləri 53,6 milyon manat təşkil edir ki, bu da cari illə müqayisədə 3,5 faiz və ya 1,8 milyon manat çoxdur.
BMT, Avropa Şurası, MDB və digər beynəlxalq təşkilatlara daxil olan bir sıra strukturlarda üzvlük haqlarının ödənilməsinə 2012-ci ildə dövlət büdcəsindən 15 milyon manat ayrılması nəzərdə tutulub. Azərbaycanın beynəlxalq arenada digər növ fəaliyyətinin təmin edilməsi üçün 32 milyon manat ayrılması planlaşdırılır.
Noyabrın 17-nə olan rəsmi məzənnə 0,7865 AZN/USD təşkil edir.
